Hwb i ganol tref Pont-y-pŵl gyda £7.6 miliwn
Bydd Cyngor Torfaen yn defnyddio £7.6 miliwn o’r Gronfa Ffyniant Bro i adfywio Canol Tref Pont-y-pŵl. Bydd adeiladau adfeiliedig yn cael eu hadnewyddu i greu bwyty a chanolfan diwylliant a chelfyddydau amlbwrpas.
Mae’r pecyn o dri phrosiect wedi’u lleoli o amgylch cyffordd Hanbury Road/Glantorvaen Road.
Canolfan ddiwylliannol a chelfyddydol
Bydd cyllid yn adfywio adeilad adfeiledig Eglwys St James, rhestredig Gradd II, yn ganolbwynt diwylliannol ffyniannus.
Bydd y ganolfan ddiwylliannol newydd yn cynnwys:
- sinema a siopau bwyd a diod dros dro
- gofod defnydd cymysg gan gynnwys bar mesanîn
- arddangosfa a gofod digwyddiadau cymunedol
Dywedodd y Cynghorydd Joanne Gauden, Aelod Gweithredol dros yr Economi, Sgiliau ac Adfywio: “Yr hwb diwylliannol yw conglfaen ein cynlluniau Creu Lleoedd Pont-y-pŵl. Mae gennym asedau gwych yn y dref a bydd yr holl brosiectau hyn yn darparu rheswm dros ymweld â Phont-y-pŵl gyda’r nos.”
Caffi a bwyty newydd
Bydd toiledau cyhoeddus gyferbyn ag Eglwys St James ac wrth fynedfa Parc Pont-y-pŵl yn cael eu hailddatblygu, hefyd. Bydd y toiledau’n cael eu trawsnewid yn gaffi a bwyty nodedig.
Bydd y caffi a’r bwyty newydd yn:
- cynnig caffi amser cinio o ansawdd uchel a bwyty ‘platiau bach’ gyda’r nos
- creu cyfleoedd ar gyfer cyflogaeth ac entrepreneuriaeth
Maes Parcio Glantorvaen
Bydd cyllid hefyd yn cael ei ddefnyddio i adnewyddu maes parcio presennol Glantorvaen.
Bydd y gwaith adnewyddu yn:
- darparu lleoedd parcio saff a diogel
- cyflwyno ynni solar i’r cyfleuster
- cynnwys pwyntiau gwefru trydanol
- lleihau’r cyfleoedd ar gyfer ymddygiad gwrthgymdeithasol
Bydd y pecyn o brosiectau yn sbarduno adfywiad ehangach Pont-y-pŵl.
Darganfyddwch fwy am Levelling Up