Hwb i arloesi ym maes amaeth yng Nghymru gan gronfa Llywodraeth y DU
Tri sefydliad yng Nghymru’n elwa o gyfran o £5 miliwn gan Llywodraeth y DU.
Photograph by Christopher Guither
Bydd tri sefydliad yng Nghymru’n elwa o gyfran o £5 miliwn gan Llywodraeth y DU i ddatblygu syniadau i ddatrys rhai o’r sialensiau amaethyddol mwyaf yn y byd, fel diogelu’r cyflenwad bwyd, rheoli chwyn ac afiechydon da byw.
Mae tri o’r tri dyfarniad ar ddeg sy’n cael eu rhoi ledled y DU yn cael eu dyfarnu i brosiectau lle mae sefydliadau o Gymru wrth y llyw. Y rhain yw:
-
Ymchwilio i amrywiaeth miled perlog i gynhyrchu gwell cynnyrch bara ar gyfer pobl sy’n dioddef o glefyd siwgr (o dan arweiniad Prifysgol Aberystwyth)
-
Lleihau gwastraff bwyd drwy reoli pryfaid ffrwythau yn Asia ac Affrica (o dan arweiniad Russell IPM Ltd. UK, Sir y Fflint)
-
Datblygu reis sy’n gallu gwrthsefyll dau afiechyd mawr i helpu i ddiogelu’r cyflenwad bwyd yn Asia (Prifysgol Bangor)
Dyma ail rownd gyllido gan Agri-Tech Catalyst, sydd werth £70 miliwn, a gyhoeddwyd fel rhan o Strategaeth Ddiwydiannol y DU ar gyfer Technolegau Amaethyddol ym mis Gorffennaf 2013. Mae Agri-Tech Catalyst wedi’i gynllunio i gefnogi gwaith ymchwil ar y cyd rhwng gwyddonwyr a busnesau i roi hwb i brosiectau o’r labordy i’r farchnad.
Dywedodd Gweinidog Swyddfa Cymru, y Farwnes Randerson:
Mae gan Gymru draddodiad ffermio balch, ac mae’n hyfryd gweld ein bod ni’n dal i fod ar flaen y gad o ran datblygiadau amaethyddol. Mae’r tri phrosiect o Gymru sy’n elwa o gyllid Llywodraeth y DU yn rhai cyffrous, a fydd yn arwain at fanteision go iawn i bobl ledled y byd, a drwy werthu’r cynhyrchion hyn ar draws y byd, gallwn gynnal safle Cymru wrth galon arloesedd byd-eang.
Mae hyn i gyd yn rhan o’n cynllun i adeiladu economi gryfach a chymdeithas decach yng Nghymru.
Rydyn ni’n falch iawn o fod yn cefnogi mentrau arloesol a gwerth chweil fel hyn.
Dywedodd y Gweinidog Prifysgolion, Gwyddoniaeth a Dinasoedd, Greg Clark:
Bydd buddsoddi mewn technoleg amaethyddol heddiw’n arwain at fanteision masnachol yfory, gan arwain at gamau pwysig o’r labordy i’r farchnad. Mae hyn i gyd yn rhan o gynllun economaidd hirdymor Llywodraeth y DU i greu rhagor o swyddi a hybu twf drwy strategaeth ddiwydiannol.