Datganiad i'r wasg

Cysylltiad newydd Crossrail yn dod â Chymru a Dinas Llundain yn nes at ei gilydd

Ysgrifennydd Gwladol Cymru yn ymweld â phrosiect Crossrail yn Paddington

• Gan: Swyddfa Ysgrifennydd Gwladol Cymru and The Rt Hon Stephen Crabb
• Cyhoeddwyd: 9 Mawrth 2016
• Diweddarwyd ddiwethaf: 9 Mawrth 2016 — Gweld pob diweddariad

Cyhoeddwyd hwn o dan y 2015 to 2016 Cameron Conservative government

Terry Morgan of Crossrail and Secretary of State for Wales Stephen Crabb view tunnelling work at Paddington Station

Bydd cysylltiad Crossrail yn byrhau teithiau ar draws Llundain i lai nag 20 munud o 2018 ymlaen, gan helpu cymudwyr sy’n teithio i Gymru ac yn ôl drwy Paddington.

Mae tua 50,000 o dunelli o ddur a gyflenwyd gan wneuthurwr o Gymru, Celsa, wedi cael ei ddefnyddio wrth adeiladu’r prosiect, sy’n galluogi cymudwyr i gyrraedd y West End, y Ddinas a Canary Wharf heb orfod newid trenau.

Bydd taith nodweddiadol o’r orsaf newydd yn Paddington i Canary Wharf yn torri mwy na chwarter awr oddi ar yr amser teithio ar drenau tanddaearol ar hyn o bryd.

Bydd y cam hwn yn atgyfnerthu statws cynyddol Caerdydd fel canolfan gwasanaethau ariannol ac yn ei gwneud yn haws i deithwyr busnes gyrraedd Cymru wrth i’r wlad barhau i ddenu prosiectau buddsoddi mawr.

Cafodd Mr Crabb ei dywys o gwmpas y safle adeiladu 35 metr dan wyneb y ddaear i weld y gwaith sy’n parhau ar y strwythur tri llawr. Bydd yr orsaf newydd yn Paddington yn agor yn 2018, a disgwylir y bydd 25 miliwn o deithwyr yn mynd trwyddi bob blwyddyn.

Dywedodd Stephen Crabb, Ysgrifennydd Gwladol Cymru:

Mae Caerdydd yn tyfu’n sydyn fel un o ganolbwyntiau gwasanaethau ariannol Prydain, ac rydyn ni angen yr isadeiledd priodol i ategu’r twf anochel mewn teithio at ddibenion busnes.

Bydd Crossrail yn torri amserau teithio rhwng Caerdydd a Dinas Llundain yn sylweddol, gan wneud Cymru’n gyrchfan hyd yn oed yn fwy deniadol ar gyfer buddsoddiadau busnes.

Mae gan y prosiect gysylltiadau cryf â Chymru, gyda miloedd o dunelli o ddur o Gymru yn rhan o’r gwaith adeiladu.

Dywedodd Terry Morgan, Cadeirydd Crossrail:

Bydd prosiect Crossrail yn trawsnewid trafnidiaeth gyhoeddus, gan ei gwneud yn gyflymach ac yn haws i bobl gyrraedd ardaloedd busnes pwysig Llundain. Bydd cymudwyr sy’n cyrraedd Paddington o Gymru yn elwa ar drenau newydd a gwasanaethau rheolaidd a fydd yn eu galluogi i deithio drwy’r brifddinas a thu hwnt heb orfod newid trenau.

Mae gwelliannau yn Paddington yn cynnwys Prosiect Integredig Paddington (PIP), prosiect cydweithio agos rhwng Transport for London, Network Rail a Crossrail Limited i greu gorsaf integredig gyda gwell profiad i deithwyr a chyfnewidiadau hawdd. Fel rhan o hyn, mae gorsaf llinell Hammersmith & City newydd wedi cael ei hadeiladu i leddfu gorlenwi, ynghyd â mynedfa newydd i gerddwyr at lwybr tynnu’r gamlas a chyfleuster newydd i dacsis i’r dwyrain o’r orsaf bresennol.

Bydd prosiect Crossrail yn dod â 1.5 miliwn yn ychwanegol o bobl o fewn 45 munud i ardaloedd cyflogaeth, hamdden a busnes allweddol Llundain, ac yn annog adfywio yr holl ffordd ar draws y brifddinas. Bydd llinell Elizabeth yn cario dros 200 miliwn o deithwyr y flwyddyn, gan ychwanegu 10% at gapasiti rheilffyrdd canol Llundain.

Bydd y rheilffordd newydd yn cael ei gweithredu gan Transport for London a bydd yn cael ei hadnabod fel llinell Elizabeth pan fydd gwasanaethau’n cychwyn.

Bydd dewisiadau teithio newydd ar gael, gan gynnwys gwasanaethau uniongyrchol i ddwyrain Llundain, a thrwy newid trên unwaith yn Farringdon gall teithwyr gyrraedd meysydd awyr Gatwick a Luton drwy ddefnyddio rhwydwaith Thameslink, a fydd yn cael ei uwchraddio a’i ehangu.

Diwedd

Gwybodaeth am Crossrail

• Cyfanswm yr arian sydd ar gael i gyflawni prosiect Crossrail yw £14.8 biliwn. Bydd y llwybr yn mynd drwy 40 o orsafoedd ac yn rhedeg dros 100km o Reading a Heathrow yn y gorllewin, drwy dwneli newydd deuol 21km (13 milltir) dan ganol Llundain i Shenfield ac Abbey Wood yn y dwyrain.

• Mae prosiect Crossrail yn cael ei gyflawni gan Crossrail Limited (CRL). Mae CRL yn is-gwmni sydd dan berchnogaeth gyflawn Transport for London. Noddir Crossrail ar y cyd gan yr Adran Drafnidiaeth a Transport for London.

• Cewch ragor o wybodaeth am Crossrail yn www.crossrail.co.uk

Cyhoeddwyd ar 9 Mawrth 2016
Diweddarwyd ddiwethaf ar 9 Mawrth 2016 + show all updates

1. 9 Mawrth 2016

   Added translation

2. 9 Mawrth 2016

   First published.