DVLA yn ychwanegu 2 wasanaeth arall i'w gwasanaeth Cyfrif gyrwyr a cherbydau
Gall modurwyr nawr adnewyddu eu trwydded yrru cerdyn-llun a gwneud cais am drwydded dros dro gyntaf drwy eu cyfrif.
Heddiw (9 Ebrill 2024) mae DVLA wedi cyhoeddi y gall modurwyr adnewyddu’r ffotograff ar eu trwydded yrru a gwneud cais am drwydded dros dro gyntaf drwy ei gwasanaeth Cyfrif gyrwyr a cherbydau.
Dyma 2 o drafodion trwydded yrru DVLA a ddefnyddir fwyaf a nhw yw’r diweddaraf mewn sawl ychwanegiad at wasanaeth Cyfrif gyrwyr a cherbydau. Mae dros 890,000 o bobl wedi cofrestru ar gyfer cyfrif ers iddo gael ei lansio llai na blwyddyn yn ôl.
Ynghyd â’r nodweddion presennol, megis dewis derbyn nodiadau atgoffa treth cerbyd drwy neges destun neu e-bost yn hytrach na dibynnu ar nodiadau atgoffa papur a anfonwyd drwy’r post, gall deiliaid cyfrifon nawr gwblhau adnewyddiad 10 mlynedd o’u trwydded yrru cerdyn-llun drwy’r Cyfrif gyrwyr a cherbydau.
Bydd modurwyr yn gallu olrhain eu cais, gweld manylion eu trwydded yrru newydd unwaith y caiff ei chyhoeddi a dewis a ddylid lanlwytho eu ffotograff eu hunain, neu ganiatáu i DVLA gyrchu a defnyddio eu ffotograff pasbort presennol yn ddigidol drwy ei dolen ddiogel â Swyddfa Basbort EF. Mae’r gwasanaeth hwn yn rhan o gynllun trawsnewid digidol uchelgeisiol DVLA, sy’n rhoi cwsmeriaid wrth wraidd ei wasanaethau, gyda’r nod o adeiladu gwasanaethau digidol cystal fel bod pobl yn dewis eu defnyddio dros sianeli eraill.
Gall gyrwyr dros dro cyntaf sydd â chyfrif hefyd weld eu trwydded yrru dros dro ac ychwanegu cerbyd sydd wedi’i gofrestru yn eu henw.
Daw’r gwasanaethau ychwanegol hyn ar ôl iddo gael ei gyhoeddi fis Hydref diwethaf y gallai gyrwyr masnachol weld eu Tystysgrif Cymhwysedd Proffesiynol i Yrwyr (CPC) a gwybodaeth tacograff drwy’r gwasanaeth Cyfrif gyrwyr a cherbydau.
Dywedodd Guy Opperman, Gweinidog y Ffyrdd a Thrafnidiaeth Leol:
Dylai adnewyddu eich trwydded yrru fod yn broses hawdd, hygyrch a syml fel y gall modurwyr barhau i yrru’n ddiogel.
Dyna pam ei bod yn wych gweld DVLA yn cynnig cyfle i fodurwyr adnewyddu eu trwydded yrru a gwneud cais am drwydded dros dro gyntaf i gyd mewn un lle, wrth i DVLA barhau i esblygu i fod yn sefydliad sy’n fwyfwy deinamig, digidol a chwsmeriaid-ganolog.
Dywedodd Julie Lennard, Prif Weithredwr DVLA:
Rydym yn falch o ddweud bod 2 o’n gwasanaethau mwyaf poblogaidd bellach ar gael drwy ein Cyfrif gyrwyr a cherbydau, gan ddarparu hyd yn oed mwy o gyfleustra i’n cwsmeriaid.
Rydym am wneud trafod gyda ni mor syml ac effeithlon â phosibl, a dyna pam y byddwn yn parhau i ychwanegu mwy o nodweddion a gwasanaethau i’r cyfrif fel y gall ein cwsmeriaid gael yr hyn sydd ei angen arnynt gan DVLA yn gyflymach ac yn haws nag erioed o’r blaen.
Gall modurwyr sydd â phasbort y DU a phasbort o’r tu allan i’r DU (gyda statws mewnfudo ar-lein dilys) sefydlu cyfrif heddiw a rhoi eu hadborth ar y gwasanaeth newydd.
Swyddfa'r wasg
Swyddfa'r Wasg y DVLA
Longview Road
Treforys
Abertawe
SA6 7JL
E-bost [email protected]
Dim ond ar gyfer newyddiadurwyr a'r wasg yn unig: 0300 123 2407