Jo Stevens AS wedi ei phenodi’n Ysgrifennydd Gwladol Cymru
Mae Jo Stevens AS wedi ymgymryd â’i rôl fel Ysgrifennydd Gwladol Cymru yn dilyn ei phenodiad gan y Prif Weinidog, Syr Keir Starmer.
Secretary of State for Wales Jo Stevens
Etholwyd Ms Stevens yn AS Dwyrain Caerdydd yn yr Etholiad Cyffredinol ar 4 Gorffennaf 2024. Yn dilyn ei phenodiad, addawodd Ms Stevens fod yn llais cryf i Gymru yn Llywodraeth newydd y Deyrnas Unedig ac i weithio’n ddiflino ar ran Cymru a phobl Cymru.
Dywedodd Jo Stevens AS, Ysgrifennydd Gwladol Cymru:
Mae’n fraint cael fy mhenodi i Swydd Ysgrifennydd Gwladol Cymru a gwasanaethu yng Nghabinet cyntaf Keir Starmer, y Prif Weinidog.
Mae gan Gymru rôl hollbwysig i’w chwarae o ran sbarduno adfywiad cenedlaethol y Deyrnas Unedig, gan gyfrannu at ein diogelwch ynni a’r diwydiannau a fydd yn sicrhau dyfodol llewyrchus.
Fy mlaenoriaeth absoliwt yw cyflawni dros Gymru a gweithio gyda Llywodraeth Cymru i sefydlogi’r economi, sbarduno buddsoddiadau a chreu swyddi.
O ganlyniad i’n cynlluniau, bydd pobl ledled Cymru yn rhannu’r ffyniant hwnnw a byddwn yn mynd i’r afael ag amddifadedd a thlodi gyda’n gilydd.
Ychwanegodd Ms Stevens:
O dan fy arweiniad i, bydd Swyddfa Cymru unwaith eto yn eiriolwr cadarn dros Gymru o fewn Llywodraeth y Deyrnas Unedig, gan sicrhau bod anghenion Cymru’n cael eu blaenoriaethu, a bod ei llais yn cael ei glywed.
Rwy’n benderfynol o ailosod y berthynas rhwng y Llywodraeth y Deyrnas Unedig a Llywodraeth Cymru. Byddwn yn cydweithredu ac yn cydweithio i sicrhau canlyniadau gwell i bobl yng Nghymru.
Mae’n anrhydedd i mi wasanaethu Cymru a’i phobl a sicrhau’r newid y mae ein llywodraeth newydd wedi ei addo.
Mae Ms Stevens wedi dechrau rhaglen lawn o gyfarfodydd, sesiynau briffio ac ymweliadau i ddechrau cyflwyno agenda’r llywodraeth newydd ar gyfer Cymru.