Ysgrifennydd Gwladol Cymru'n cwrdd â phrentisiaid sy’n gweithio ar fand eang tra chyflym
Ysgrifennydd Gwladol Cymru, Robert Buckland, yn ymweld â Chanolfan Dysgu Cenedlaethol Cymru cwmni cyfathrebu Openreach, i weld hyfforddiant ar gyfer recriwtiaid newydd
Secretary of State for Wales, Sir Robert Buckland, at Openreach's National Training Centre in Newport
Yn ddiweddar ymwelodd Ysgrifennydd Gwladol Cymru, Sir Robert Buckland, a Chanolfan Dysgu Cenedlaethol Cymru Openreach i weld hyfforddiant ar gyfer recriwtiaid newydd sy’n dod â band eang tra chyflym i Gymru.
Mae’r Ganolfan newydd gwerth sawl miliwn yng Nghasnewydd yn rhoi cyfle i ddarparwr beiranwyr a rhai profiadol i brofi sgiliau newydd mewn stryd sy’n adlewyrchu’r byd go iawn, wrth ailgreu’r rhwydwaith yn y byd mawr.
Dros y blynyddoedd diwethaf, mae Openreach wedi recriwtio llawer o bobl er mwyn lledu band eang ffeibr cyflawn drwy Gymru a gweddill y Deyrnas Unedig. Mae’r ganolfan ddysgu yn chwarae rôl integrol wrth alluogi’r busnes i gyrraedd y targed o wasanaethu 25 miliwn cartref a busnes yn y DU erbyn mis Rhagfyr 2026.
Yng Nghymru, ar hyn o bryd mae oddeutu 160 prentis Openreach - o bob oedran - yn derbyn hyfforddiant, gydag oedran cyfartalog o 31. Wrth ymweld â’r ganolfan, cyfarfu Ysgrifennydd Gwladol Cymru â nifer o brentisiaid sydd wedi penderfynu dod yn beirianwyr yn hwyrach yn eu gyrfaoedd, yn cynnwys Mariaisabel Ferrandez o Gaerdydd. Yn ddiweddar, graddiodd Mariaisabel o’i phrentisiaeth gydag Openreach ar ôl treulio nifer o flynyddoedd fel technegydd ambiwlans brys gyda Gwasanaeth Ambiwlans Cymru. Roedd am newid ei gyrfa er mwyn gweithio yn yr awyr agored a chael cyfle i ddysgu a datblygu ei gyrfa, felly penderfynodd Mariaisabel roi cynnig ar Openreach.
Esboniodd Mariaisabel:
Roeddwn wedi ystyried newid gyrfa am gyfnod ond heb bennu beth yn union roeddwn am wneud. Roedd ffrindiau wedi dweud bod Openreach yn gyflogwr da ac yn edrych i recriwtio mwy o fenywod fel peirianwyr, felly edrychais i weld y math o waith roedd yn cynnig.
Wrth wneud hynny, sylweddolais mai bod yn beiriannydd Openreach oedd y peth iawn i mi.
Mae hyfforddiant canolfan Casnewydd yn ardderchog.
Dywedodd Ysgrifennydd Gwladol Cymru, Syr Robert Buckland:
Erbyn hyn mae pawb yn deall pa mor bwysig yw cysylltiadau band eang cyflym a dibynadwy.
Roedd yn wych gweld ffrwyth buddsoddiad Openreach yn ei rwydwaith ffeibr cyflawn, ynghyd â hyfforddi a datblygu recriwtiaid newydd a pheirianwyr profiadol.
Yn ogystal, roedd yn dda cyfarfod recriwtiaid newydd fel Mariaisabel a chlywed am eu cyfraniad gwerthfawr at yr economi wrth adeiladu rhwydwaith tra-chyflym i wasanaethu’r wlad gyfan.
Dywedodd Kim Mears, rheolwr gyfarwyddwraig Openreach a chadeirydd Bwrdd Openreach Cymru:
Mae Canolfan Ddysgu Cenedlaethol Cymru yn adlewyrchu ymroddiad y cwmni nid yn unig wrth barhau i ddysgu a datblygu, ond hefyd i gefnogi Cymru gyfan.
Bydd y rhan helaeth o’r recriwtiaid yn dod yma i Gasnewydd i dderbyn hyfforddiant cyn mynd allan i’r byd go iawn a’n helpu i adeiladu ein rhwydwaith ffeibr cyflawn yn gyflym ar draws y wlad.