Guidance

Dosie linformasion avan-depar pou sitwayin britanik desandan sagosien

Published 29 August 2023

An Novam 2022, Gouvernman UK finn demar enn nouvo prosedir pou bann dimounn desandan Sagosien pou gagn nasionalite britanik. Sa fer swit avek enn lalwa presedan ki ti donn nasionalite Britanik a bann dimounn ki ti ne lor British Indian Ocean Territory (BIOT) / Larsipel Sagos ek osi a zot zanfan.

Sa dosie linformasion la destine a bann sitwayin britanik ki desandan sagosien e ki pe pans pou al viv dan UK.

Sa gid-la donn linformasion lor bann konsiderasion ki ou bizin ena avan ou pans pou al viv dan UK. Nou finn osi pibliye enn dosie linformasion pou bann larive, avek bann ransegnman lor kouma zer lavi okotidien dan UK.

Depi Zilyet 2023, tou bann to-esanz depi Liv Sterlin ver Roupi Moris zot presi.

Ki ou bizin avan al UK

Avan ki ou al UK, ou bizin:

• Nasionalite britanik
• Swa enn paspor britanik ou enn certificate of entitlement dan enn lot paspor ki ou ena
• Enn plas kot ou pou reste

Ou pou gagn plis linformasion lor sa bann eleman-la inpe pli lwin dan sa gid-la, avek osi linformasion lor akse avek anplwa ek ledikasion.

Ou kapav osi lir bann Kestion ki Souvan Poze pou plis linformasion lor: https://www.gov.uk/government/publications/moving-to-the-uk-and-british-citizenship-guidance-for-chagossians/moving-to-the-uk-and-british-citizenship-guidance-for-chagossians.

Dokimantasion

Avan ki ou al viv UK, ou bizin ena (1) nasionalite britanik ek (2) swa enn paspor britanik ouswa enn certificate of entitlement dan enn lot paspor ki ou ena.

Si ou napa oule enn paspor britanik, ou gagn drwa servi ou paspor non-britanik inikman si sa paspor-la ena enn certificate of entitlement ki montre drwa rezidans.

Si ou al UK avan ki ou finn gagn nasionalite britanik, ou pou bizin swiv bann regleman an viger konsernan viza UK ki trouv lor: https://www.gov.uk/check-uk-visa. Si ou al UK san nasionalite britanik e ki pe sispekte ki ou pou viol bann regleman an viger konsernan viza UK, kapav deport ou kan ou arive.

Si ou res dan UK san otorizasion, ou napa pou gagn akse avek travay, ni avek bann lavantaz ou servis, pandan ki pe travay lor ou aplikasion pou nasionalite britanik.

Plas pou reste

Avan ki ou al viv UK, ou bizin fini pran ou dispozision pou kone kot ou pou reste. Si ou napa fer sa, ou riske vinn san-zabri. Ou kapav swazir pou res avek fami ou kamarad, ouswa trouv enn plas kot ou pou res dan ou kote. Ou pou trouv zis apre bann opsion ki ou ena pou trouv ou prop plas kot pou viv dan UK.

An term lozman, okenn dimounn ouswa fami napa pou gagn priorite, ek tou group pou gagn tretman egal.

Lozman

Kan ou vinn viv UK, ou ena de-trwa opsion pou lozman, ek sa inklir:

1. Lokasion prive

2. Aste ou prop lakaz

3. Lozman sosial – ena enn long lalis datant pou lozman sosial dan UK, ek sa opsion-la napa garanti ki ou gagn enn lozman.

Desizion konsernan landrwa kot ou pou viv li inportan parski pri ek disponibilite lozman pou varye dan diferan parti pei. Lozman dan lavil, kouma par exanp London, souvan se bann tipti lapartman parski pri lozman bokou pli ser.

Lwe enn lakaz

Ou gagn drwa lwe enn propriete dan UK. Ou kapav trouv enn propriete pou lwe atraver bann letting agents [azan lokasion imobilie] ek lor bann sit internet lanons imobilie.

Kan ou trouv enn lakaz ouswa enn lapartman pou lwe, ou pou probableman bizin pey enn depozit. Ou proprieter ena obligasion protez ou depozit.

Letting agents (azan lokasion imobilie) ek proprieter fer verifikasion referans avan aksepte enn nouvo lokater. Sa kapav inklir bann exizans onivo reveni ouswa nesesite pou ena enn garan.

Ou bizin resevwar enn ‘kontra lokasion’. Se enn kontra legal ant ou ek proprieter. Ou kontra lokasion bizin etablir komie lokasion bizin peye e dan ki frekans, dire ou lokasion, ek responsabilite lokater ek proprieter.

Ou kapav gagn ransegnman lor ou responsabilite ek drwa antan ki lokater lor ‘How to Rent Guide’ [‘Gid lor koman lwe’] Gouvernman: https://www.gov.uk/government/publications/how-to-rent/how-to-rent-the-checklist-for-renting-in-england .

Ou kapav gagn bann linformasion lor lokasion imobilie dan Lekos lor: https://www.mygov.scot/browse/housing-local-services/renting-property

An zeneral, dire lokasion pou lor enn peryod fix 6 ouswa 12 mwa (dan Langleter ek Wales). Ou ena obligasion pey lwaye pou dire ou lokasion. Li vreman inportan ki ou pey ou lokasion atan. Nou konsey ou komans ekonomize pou ki ou kapav zer bann fre asosie avek kou-d-lavi, e sa inklir lokasion, tax imobilie, gaz, elektriksite ek delo.

Tablo zis apre prezant montan lwaye par mwa an mwayenn pou tou kategori lokasion dan diferan rezion UK. Ou kapav trouve kot sa bann rezion-la ete dan UK lor map ki zis anba.

Statistik pou Marse Lokasion Prive

Enn rezime montan lwaye par mwa pou tou kategori lokasion, par rezion, ki finn anrezistre ant 1 Avril 2022 ek 31 Mars 2023.

Rezion	Lwaye par mwa an mwayenn (an Liv Sterlin)	Lwaye par mwa an mwayenn (an Roupi Moris)
England [Langleter]	825	48,811
North east [Nor-Es]	550	32,540
North west [Nor-Wes]	650	38,457
Yorkshire ek the Humber	650	38,457
East Midlands [Midlands-de-les]	675	39,936
West Midlands [Midlands-de-lwes]	725	42,894
East [Les]	900	53,248
London	1,500	88,746
Inner London	1,797	106,318
Outer London	1,375	81,351
South east [Sid-Es]	998	59,046
South west [Sid-Wes]	825	48,811

Sours: Baz done administratif VOA le 31 Mars 2023

Avek kalkilater online ki trouv lor: https://www.gov.uk/government/publications/understanding-local-housing-allowances-rates-broad-rental-market-areas, verifie si ou kapav permet ou viv dan rezion ki ou pe anvi.

Si ou elizib pou ‘Universal Credit’, ou peman kapav osi inklir enn eleman konsernan ‘kou lozman’ ki kapav ede dan peman ou lozman. Kapav gagn plis ransegnman lor: https://www.moneyhelper.org.uk/en/benefits/benefits-to-help-with-housing-costs/universal-credit-and-paying-rent?source=mas.

Toutfwa, sertin lavantaz sosial inplik bann exizans an term rezidans. Savedir ki ou pou kapav gagn akse avek zot inikman kan ou finn viv dan UK pou enn sertin nonb letan defini. Li donk posib ki ou napa pou kapav benefisie depi sertin lavantaz kan ou fek ariv UK.

Kapav gagn plis linformasion lor lokasion, faktir ek bann lavantaz avek Citizens Advice.

Tax imobilie

Ou ena lobligasion pey tax imobilie (Council Tax) pou ou propriete. Se enn montan ki finn definir pou lane finansie ki komanse Avril ek fini an Mars, ek ou kapav pey li sak mwa. Tax imobilie se enn tax ki al dan lakes ou lotorite lokal pou bann servis lokal kouma swin, servis sosial, lapolis ek infrastriktir lokal.

Gaz, elektrisite ek delo

Ou resevwar delo depi ou fourniser lokal delo. Pou kone kisann-la ou fourniser lokal delo ete, al lor: https://www.dwi.gov.uk/consumers/find-your-local-water-company/ (Pou Langleter ek Wales inikman). Si ou dan Lekos ouswa Irland-di-Nor, delo fourni par Scottish Water ouswa Northern Ireland Water.

Ou kapav swazir ou prop fourniser lenerzi pou gaz ek elektrisite.

Aste ou prop lakaz

Aste enn lakaz inplik enn long prosesis ki kapav pran plizier mwa. Laplipar dimounn komans rod lakaz lor bann sit imobilie online ouswa atraver bann azan imobilie lokal.

Pri lakaz partou dan UK bien diferan. Ou pou probableman bizin pey enn depozit (omwin 10% valer propriete-la).

An Mars 2023, pri lakaz an mwayenn dan UK ti £285,000 (ou Rs 16,861,829 an term Roupi Moris). An mwayenn, pri lakaz dan London res seki pli ser konpare avek ninport ki lezot rezion dan UK, avek enn pri mwayin £523,000 (ou Rs 30,942,936 an term Roupi Moris) an Mars 2023.

Si ou pe konsider opsion aste ou prop lakaz, lir gid detaye propoze par Gouvernman lor: https://www.gov.uk/government/publications/how-to-buy-a-home/how-to-buy

Pou gagn plis linformasion lor aste enn lakaz dan Irland-di-Nor, Lekos ouswa Wales, al lor:

https://www.nidirect.gov.uk

https://www.mygov.scot/buying-a-home

https://gov.wales/

Lozman sosial

Lozman sosial li abitielman enn lakaz ouswa enn lapartman ki kout mwin ser, ki fourni par Konsey (council). Bizin fer aplikasion pou lozman sosial atraver ou konsey lokal (local council) ouswa atraver enn asosiasion pou lozman.

An zeneral, ou pou al lor enn long lalis datant, ki pou laplipar, al plis ki enn an. E sa napa donn ou garanti ki ou pou gagn enn lozman. Par exanp, ena anviron 307, 000 fami lor lalis datant pou enn lozman sosial pou London.

Gagn enn travay

Antan ki enn sitwayin britanik, ou ena drwa travay dan UK. Toutfwa, ou napa pou gagn enn travay otomatikman.Pou rod enn travay, ou kapav servi enn sit internet gouvernman ki gratis ki apel ‘Find a Job’ - https://www.gov.uk/find-a-job pou konekte avek milie anplwayer atraver UK. Ou kapav rod travay san ena enn kont. Pou apply pou enn travay, ou pou bizin kree enn kont ouswa sign in.

Si ou bizin led pou rod enn travay, ou kapav:

• Inskrir ou avek ou Jobcentre Plus lokal, ou kapav rod ou Jobcentre Plus lokal lor https://find-your-nearest-jobcentre.dwp.gov.uk/search.php ;
• Rod dan bann zournal lokal ek nasional ouswa lor bann sit rekritman kot met lanons pou post travay;
• Inskrir ou avek enn lazans rekritman ki kapav rod bann post vakan pou ou;
• Al dan bann konpani lokal pou demande si zot ena post vakan.

Ou kapav gagn konsey ek led konsernan karyer depi National Careers Service lor: https://nationalcareers.service.gov.uk/

Konsey pou karyer – Langleter

Ou kapav gagn konsey ek led konsernan karyer depi National Careers Service ki donn linformasion lor karyer a bann adilt dan Langleter – an prezansiel, online ouswa par telefonn. Bann zenn ki ena 13 an ek plis kapav telefonn lor 0800 100 900 pou gagn led. Kapav gagn plis linformasion lor: https://nationalcareers.service.gov.uk/

Konsey pou karyer – Lekos

Skills Development Scotland (SDS) se organism nasional Lekos pou konpetans. Kapav kontakte asistans telefonik individiel lor 0800 917 8000. Kapav osi gagn plis ransegnman lor: https://www.skillsdevelopmentscotland.co.uk/

Konsey pou karyer - Wales

Careers Wales kapav ed ou pou planifie ou karyer, prepar ou pou gagn enn travay, ek trouv ek fer aplikasion pou staz, kour ek formasion ki plis apropriye. Kapav gagn plis linformasion lor: https://careerswales.gov.wales/

Konsey pou karyer – Irland-di-Nor

Careers Service donn bann linformasion, konsey ek gid lor karyer, a bann dimounn ki viv dan Irland-di-Nor. Kapav gagn plis ransengman lor: https://www.nidirect.gov.uk/careers-service.

Ou bann drwa ek proteksion dan travay

Kan ou al travay, ou ena drwa ki tret ou dan enn fason ekitab ek travay dan enn lanvironnman sekirize. Se osi ou drwa pou kapav travay san gagn per ouswa san sibir arselman depi ou anplwayer, koleg ouswa kliyan.

Dan UK, kan ou gagn enn travay, ou bizin osi gagn enn kontra travay ouswa enn lakor travay. Pou ena bann term ek kondision ou travay dan ou kontra ouswa dan ou lakor. Asir ou ki ou lir li atantivman, e si neseser, avek enn interpret, avan ki ou signe.

Si ou enn travayer, ou pou benefisie bann drwa an term lanplwa kouma:

• Enn saler minimal £ 10.42 (ouswa Rs 616.49 an term Roupi Moris) pou bann dimounn 23 an ek plis
• Proteksion pou anpes ou anplwayer pran larzan depi ou lapey
• Enn brek 20 minit si ou travay plis ki si-z-er par zour
• Travay enn maximum 48hr an mwayenn par semenn ouswa pou swazir ki ou napa oule sa drwa la si ou deside
• Proteksion kont diskriminasion ilegal
• Proteksion si ou pe denons enn maldonn dan travay
• Enn mem tretman si ou travay part-time ki enn dimounn ki travay full-time

Si ou panse ki ou finn sibir enn diskriminasion inzis, ou kapav gagn linformasion ek soutien depi enn sit ki apel Equality Advisory Service: www.equalityadvisoryservice.com

Si pe fors ou pou travay ouswa ki ou anplwayer napa pe respekte ou drwa, ou kapav gagn konsey depi Modern Slavery Helpline lor 0800 0121 700.

Fer ou kalifikasion profesionel rekonet dan UK

Si ou ena kalifikasion profesionel, ou pou bizin fer li rekonet ofisielman si ou anvi travay dan enn profesion ki reglemante dan UK. Li pou bizin rekonet par enn regilater apropriye pou ou profesion. Ou pou bizin fer sa mem si ou pe travay lor enn baz tanporer ou ponktiel.

UK Centre for Professional Qualifications (UK CPQ) li enn servis gratis ki kapav donn ou linformasion pou fer ou kalifikasion rekonet dan UK. Ou kapav al lor UK CPQ website pou plis linformasion kouma, eski enn profesion reglemante e ki bann exizans pou gagn akse avek sa profesion-la: https://cpq.ecctis.com/. Ou kapav osi telefonn zot servis ransegnman lor 0871 226 2850.

Si ou ena bann kalifikasion ki pa vinn depi UK, ou kapav apply pou enn Statement of Comparability (Deklarasion Konparabilite) pou asire ki ou bann kalifikasion rekonet par bann anplwayer ek fourniser ledikasion dan UK.

Gouvernman UK pe pey fre Statement of Comparability (Deklarasion Konparabilite) pou bann Sagosien ki elizib. Pou apply, ouswa pou gagn plis linformasion, kontakte [email protected].

Ledikasion

Dan Langleter, bann paran bizin asire ki zot zanfan resevwar enn ledikasion an full-time adekwat, ant laz 5 ek 16 an. Toutfwa, bann zanfan benefisie enn plas dan lekol ki finanse par gouvernman apartir komansman lane skoler (1 Septam) apre zot katriyem laniverser.

Ou kapav apply pou enn plas dan lekol pou ou zanfan swa kan ou arive ou avan ki ou vinn dan UK.

Pou gagn led pou trouv enn plas dan enn lekol finanse par gouvernman, ou pou bizin kontakte lekip responsab admision dan lekol, dapre konsey lokal rezion kot ou pe planifie pou reste. Zot pou inform ou ki lekol ki ena plas vakan. Servi enn UK postcode pou rod enn konsey lokal lor: https://www.gov.uk/find-local-council.