Canllawiau

Cyfarwyddyd ymarfer 58: Ffurf cofrestri ar gyfer teitlau yng Nghymru

Diweddarwyd 1 Chwefror 2021

Yn berthnasol i Gymru a Loegr

Sylwer bod cyfarwyddiadau ymarfer Cofrestrfa Tir EF wedi eu hanelu’n bennaf at gyfreithwyr a thrawsgludwyr eraill. Maent yn aml yn delio â materion cymhleth ac yn defnyddio termau cyfreithiol.

1. Cyflwyniad

Mae gan Gofrestrfa Tir EF Gynllun Iaith Gymraeg a baratowyd o dan adran 21(3) o Ddeddf yr laith Gymraeg 1993, a derbyniodd gymeradwyaeth lawn Bwrdd yr Iaith Gymraeg ym Mawrth 1998. Mae’r cynllun yn darparu y byddwn yn trin y Gymraeg a’r Saesneg ar sail gyfartal wrth ddelio â’r cyhoedd yng Nghymru. Mae’r ffurf a amlinellir yn Ffurf a phryd y daeth i rym yn deillio o’r egwyddor hon.

2. Ffurf a phryd y daeth i rym

Daeth y ffurf a wnaed i gydymffurfio â’r Cynllun Iaith Gymraeg i rym ar 1 Hydref 2001 ac mae fel a ganlyn.

• cynhyrchir templed y gofrestr ar ffurf ddwyieithog. Mae’r penawdau a’r wybodaeth safonol (er enghraifft, ‘Cofrestr Eiddo’ neu ‘Teitl Llwyr’) yn ymddangos yn Gymraeg a Saesneg ar gofrestr pob teitl yng Nghymru
• mae cofnodion unigol y gofrestr yn ymddangos yn iaith (Cymraeg neu Saesneg) y ddogfen wreiddiol y seiliwyd hwy arnynt. Felly, lle mai’r Gymraeg yw iaith y dogfennau gwreiddiol, mae’r cofnodion yn Gymraeg; lle mai Saesneg yw iaith y dogfennau gwreiddiol, mae’r cofnodion yn Saesneg. Ni ellir cofnodi cofnodion dwyieithog. Lle nad oes dogfen, mae cofnod y gofrestr yn adlewyrchu dewis iaith y ceisydd a gyflwynodd y cais.

3. Cofnodion nad ydynt yn deillio o weithred

Lle nad oes dogfen, er enghraifft pan fo cofnod o natur gyffredinol neu’n cyfeirio at sefyllfa’r cynllun teitl yn unig, mae iaith y cofnod hwnnw’n adlewyrchu dewis iaith y ceisydd naill ai yn y cais cyfredol, neu os cynhyrchir y cais cyfredol gan Gofrestrfa Tir EF ei hunan, ar sail dewis iaith y perchennog cofrestredig cyfredol.

4. Cyfieithu cofnodion y gofrestr

Sylwer nad yw Cofrestrfa Tir EF yn darparu gwasanaeth i gyfieithu cofnodion y gofrestr (i’r Saesneg neu’r Gymraeg) gan na fyddai gan y cyfieithiad statws cyfreithiol. Cyfrifoldeb y cwsmer/cyfreithiwr yw trefnu cyfieithiad os oes angen hyn.

5. Cyfeiriad ar gyfer gohebu

Gall y cyfeiriad ar gyfer gohebu yn y gofrestr perchnogaeth, sy’n bersonol i’r perchennog unigol, fod yn Gymraeg naill ai’n unol â dewis iaith y ceisydd neu ar gais. Sylwch, fodd bynnag, fod hyn yn gymwys i eiddo yng Nghymru’n unig. Am ragor o wybodaeth gyffredinol, yn enwedig o ran effaith Rheolau Cofrestru Tir 2003, gweler cyfarwyddyd ymarfer 55: cyfeiriad ar gyfer gohebu.

6. Ceisiadau wedi eu seilio ar ddogfennau Cymraeg a gyflwynwyd cyn 1 Hydref 2001

O 1 Hydref 2001, mae Cofrestrfa Tir EF, Swyddfa Abertawe wedi argraffu pob cofrestr ar dempled cofrestr ddwyieithog heb ystyried y dyddiad y crëwyd y gofrestr ei hunan. Cyfieithwyd cofnodion yn deillio o ddogfennau Cymraeg a gyflwynwyd cyn 1 Hydref 2001 i’r Saesneg ar gyfer eu gosod ar y gofrestr. Nid yw’n fwriad gennym ddiwygio’r cofnodion hynny.

7. Os yw eich eiddo yn Lloegr, ni allwch gael eich cofrestr yn Gymraeg

Mae’r ffurf a nodir uchod yn effeithio ar gofrestri tir yng Nghymru yn unig. O ganlyniad, nid oes modd i Gymry alltud sy’n byw yn Lloegr neu Gymry sy’n berchen ar dir yn Lloegr gael cofrestri tir yn Lloegr ar dempled dwyieithog. Nid oes modd ychwaith creu cofnodion Cymraeg ar y cofrestri hynny.

8. Penawdau neu allweddi ar gynlluniau teitl

Nid yw’n fwriad gennym gyfieithu penawdau neu allweddi ar gynlluniau teitl.

9. Â phwy i gysylltu am wybodaeth bellach neu gymorth

Dylid cyfeirio ymholiadau ynglŷn â’r ffurf hon at:

Eleri Sparnon Jones, Pennaeth y Gwasanaethau Cymraeg

Cofrestrfa Tir EF
Tŷ Cwm Tawe
Ffordd y Ffenics
Parc Anturiaeth Abertawe
Abertawe
SA7 9FQ

E-bost [email protected]

Ffôn 0300 006 9567

10. Pethau i’w cofio

Dim ond gwybodaeth ffeithiol a chyngor diduedd ynghylch ein gweithdrefnau rydym yn eu darparu. Darllenwch ragor am y cyngor rydym yn ei roi.