Deunydd hyrwyddo

Pethau i’w hystyried pan fyddwch yn penodi cyfryngwr tollau

Diweddarwyd 10 Hydref 2023

Os yw’ch busnes wedi’i leoli yn y DU a’ch bod yn mewnforio nwyddau o’r UE neu’n allforio nwyddau iddi, neu unrhyw le yn y byd, gallai penodi cyfryngwr tollau fod o fudd i chi.

Gallai cyfryngwyr tollau ddelio â datganiadau mewnforio ac allforio ar eich rhan. Mae llawer o fusnesau yn penderfynu defnyddio cyfryngwr tollau gan fod datganiadau tollau’n gallu bod yn gymhleth.

Dewch o hyd i ragor o wybodaeth am benodi cyfryngwr tollau, gan gynnwys rhestr o gyfryngwyr tollau a all eich helpu.

Cyn penodi cyfryngwr tollau, mae sawl peth i’w ystyried, megis:

• eich gofynion busnes – y math o nwyddau rydych yn eu symud, pa mor aml rydych yn eu symud a ble rydych yn eu symud iddo neu oddi yno
• cyfeintiau – faint o ddatganiadau rydych yn disgwyl eu gwneud
• trwyddedu – p’un a oes angen trwydded, triniaeth arbennig neu reolaethau arbenigol eraill ar eich nwyddau
• amseru – a oes angen i’ch nwyddau gyrraedd o fewn amserlen benodol
• eich anghenion o ran hyfforddiant tollau.

Bydd bod yn glir ar y pwyntiau hyn yn eich galluogi i wneud penderfyniad gwybodus wrth benodi cyfryngwr tollau i’ch helpu gyda phrosesau tollau ar gyfer mewnforio neu allforio.

Eich gofynion busnes

Sicrhewch fod gennych ddigon o wybodaeth am eich gofynion cyn i chi siarad â chyfryngwr tollau, yn enwedig:

• pa fath o nwyddau rydych yn eu symud
• pa mor aml rydych yn eu symud
• a ble rydych yn eu symud iddo neu oddi yno – er enghraifft, y gwledydd rydych yn masnachu â nhw yn aml.

Dylech ystyried gofyn y canlynol i’r cyfryngwr tollau:

• pa brofiad o ran y tollau sydd gennych?
• pa fath o nwyddau ydych yn eu symud?
• pa lwybrau/gwledydd sy’n rhan o’ch cwmpas?
• a allwch ymdrin â gweithdrefnau’r tollau ar gyfer y gwledydd rwyf yn masnachu â nhw?

Faint o ddatganiadau y mae angen i chi eu gwneud

Bydd angen i chi wybod y canlynol:

• faint o ddatganiadau rydych yn disgwyl eu gwneud mewn wythnos neu fis
• pa mor aml rydych yn symud nwyddau i’r DU neu allan ohoni.

Gallwch ddefnyddio’r twlsyn, sy’n gwirio a oes angen i chi ddatgan nwyddau rydych yn dod â nhw i mewn i’r DU neu’n mynd â nhw allan ohoni, i’ch helpu i amcangyfrif faint o ddatganiadau y gallai fod angen i chi eu gwneud.

Dylech hefyd ddeall sut y bydd y cyfryngwr tollau yn codi tâl arnoch am ei wasanaethau.

Ystyriwch ofyn y canlynol i’r cyfryngwr tollau:

• a oes gennych y gallu i ymdrin â nifer y datganiadau yr wyf yn disgwyl eu gwneud? (dylech allu rhoi amcangyfrif o hyn iddo)
• sut yr hoffech gael eich talu? (er enghraifft, efallai y bydd yn codi ffi benodedig, ffi am bob datganiad, neu’r ddau).

Trwyddedau, triniaeth arbennig neu reolaethau eraill

Mae angen i chi wybod a oes angen trwydded, triniaeth arbennig neu reolaethau arbenigol eraill ar eich nwyddau.

Ystyriwch ofyn i’r cyfryngwr tollau a all gadarnhau a fydd ganddo’r gallu i ymdrin â’ch anghenion o ran trwyddedu.

Amseru – nwyddau sydd angen cyrraedd yn gyflym

Meddyliwch a oes angen i’ch nwyddau gyrraedd pen eu taith o fewn amserlen benodol neu a oes angen gwneud newidiadau cyflym neu newidiadau y tu allan i oriau.

Dylech ystyried gofyn y canlynol i’r cyfryngwr tollau:

• a allwch flaenoriaethu datganiadau ar gyfer nwyddau sydd, er enghraifft, angen cyrraedd pen eu taith o fewn amserlen benodol?
• a allwch ymateb yn gyflym i faterion annisgwyl a allai godi wrth i nwyddau gael eu mewnforio neu eu hallforio?

Hyfforddiant a chymorth

Gan fod y tollau yn gymhleth, meddyliwch a fydd angen unrhyw hyfforddiant neu gymorth arnoch.

Dylech ystyried gofyn y canlynol i’r cyfryngwr tollau:

• a ydych yn darparu unrhyw hyfforddiant a chymorth ar gyfer y tollau?
• a ydych yn gwybod am unrhyw ddarparwyr hyfforddiant tollau eraill?

Gallwch wirio rhestr o ddarparwyr hyfforddiant tollau.

Yr hyn sydd ei angen arnoch gan gyfryngwr tollau

Meddyliwch am yr hyn rydych angen i’ch cyfryngwr tollau ei wneud, a’r hyn y gallwch ei wneud eich hun neu’r hyn y mae rhywun eisoes yn ei wneud i chi.

Dylech ystyried gofyn y canlynol i’r cyfryngwr tollau:

• beth yw ystod lawn y gwasanaethau rydych yn eu darparu?
• beth fyddech chi a’r cyfryngwr tollau’n gyfrifol amdano? (er enghraifft, pwy fyddai’n gyfrifol am ddatganiadau mewnforio/allforio, datganiadau diogelwch, anghenion cludiant)

Rhannu gwybodaeth

Meddyliwch am y dull mwyaf cyfleus i chi anfon gwybodaeth at eich cyfryngwr tollau i’w alluogi i weithredu ar eich rhan, a gwiriwch a fydd hynny’n gweithio iddo hefyd.

Dylech ystyried gofyn y canlynol i’r cyfryngwr tollau:

• pa wybodaeth fydd ei hangen arnoch gennyf?
• pa mor aml fydd angen yr wybodaeth hon gennyf arnoch?
• a allaf roi’r wybodaeth mewn ffordd sy’n addas i mi?

Gogledd Iwerddon

Os ydych yn symud nwyddau drwy Ogledd Iwerddon, dylech ystyried gofyn y canlynol i’r cyfryngwr tollau:

• a oes gennych fynediad at y Gwasanaeth Cymorth i Fasnachwyr?
• a allwch wneud datganiadau ar gyfer nwyddau sy’n symud drwy Ogledd Iwerddon?