Byddardod galwedigaethol: arweiniad ar gwblhau’r ffurflenni cais (BI100PDW a BI100ODW)
Diweddarwyd 22 Mai 2024
© Hawlfraint y Goron 2024
Mae'r cyhoeddiad hwn wedi'i drwyddedu o dan delerau Trwydded Agored y Llywodraeth v3.0 ac eithrio ble nodir yn wahanol. I weld y drwydded hon, ewch i nationalarchives.gov.uk/doc/open-government-licence/version/3 neu ysgrifennwch at y Tîm Polisi Gwybodaeth, Yr Archifau Gwladol, Kew, Llundain TW9 4DU, neu anfonwch e-bost at: [email protected].
Lle byddwn wedi nodi unrhyw wybodaeth am hawlfraint trydydd parti, bydd angen i chi gael caniatâd gan ddeiliaid yr hawlfraint dan sylw.
Mae'r cyhoeddiad hwn ar gael yn https://www.gov.uk/government/publications/industrial-injuries-disablement-benefit-claim-forms/42246f1c-7214-44de-be2c-47bad65b7b55
Defnyddiwch y nodiadau hyn i’ch helpu i gwblhau’r ffurflenni cais os ydych yn gwneud cais am Fudd-dal Anabledd Anafiadau Diwydiannol am fyddardod galwedigaethol (afiechyd rhagnodedig A10).
Cymhwysedd
I fod yn gymwys i gael Budd-dal Anabledd Anafiadau Diwydiannol (IIDB) am yr afiechyd rhagnodedig A10 byddardod galwedigaethol, mae’n rhaid i chi fod wedi:
- colli clyw o 50dB neu fwy ym mhob clust
- gweithio, neu’n gweithio’n agos at rywun, am 10 mlynedd neu fwy, gan ddefnyddio offer neu beiriannau penodol sy’n debygol o achosi byddardod
Gallwch ddefnyddio gwahanol gyfnodau i gwmpasu’r 10 mlynedd.
Enghraifft
Os ydych yn hawlio ar 19 Chwefror 2020 gallwch fod wedi gweithio, neu wedi gweithio’n agos i rywun, gan ddefnyddio offer neu beiriannau penodol sy’n debygol o achosi byddardod am:
- y 3 blynedd o 1 Chwefror 2000 i 31 Ionawr 2003
- y 2 flynedd o 1 Chwefror 2008 i 31 Ionawr 2010
- y 5 mlynedd o 13 Chwefror 2015 i 12 Chwefror 2020
Nid yw cyfnodau hunangyflogaeth yn cyfrif.
Mae’n rhaid eich bod wedi bod yn gwneud y gwaith hwnnw o fewn 5 mlynedd i’r dyddiad rydych yn gwneud cais.
Dewch o hyd i restr o offer neu beiriannau sy’n debygol o achosi byddardod o dan afiechyd rhif A10 byddardod galwedigaethol.
Aelodau o’r lluoedd arfog
Mae Veterans UK yn gweithredu cynllun ar wahân ar gyfer aelodau’r lluoedd arfog. Am ragor o wybodaeth, ffoniwch: 0800 169 2277.
Sut i wneud cais
Cwblhewch ffurflenni BI100PDW a BI100ODW.
Ffurflen BI100PDW, Rhan 3: Ynglŷn â’ch gwaith neu’ch cynllun neu gwrs hyfforddi cyflogaeth a gymeradwywyd a’ch afiechyd
Lle byddwch yn cwblhau ‘Rhan 3: Ynglŷn â’ch gwaith neu’ch cynllun neu gwrs hyfforddi cyflogaeth a gymeradwywyd a’ch afiechyd, dywedwch wrthym:
- pa afiechyd neu afiechydon sydd gennych
- manylion pob un o’r swyddi neu’r hyfforddiant lle gwnaethoch ddefnyddio, neu weithio’n agos i rywun sy’n defnyddio, offer neu beiriannau sy’n debygol o achosi byddardod
Mae’n rhaid i’ch gwybodaeth gyflogaeth:
- cwmpasu 10 mlynedd neu fwy
- dangos yr oeddech yn gwneud y gwaith neu’r hyfforddiant hwnnw yn ystod y 5 mlynedd diwethaf
Efallai y byddwch am ystyried y cyflogwyr roeddech yn gweithio iddynt am y cyfnod hiraf. Gallai hyn gwmpasu’r 10 mlynedd sydd ei angen ac efallai na fydd angen i chi roi manylion pob cyflogwr.
Os oes angen i chi ddweud wrthym am fwy na 2 gyflogwr, defnyddiwch dudalen olaf y ffurflen gais BI100PDW i roi’r wybodaeth ychwanegol i ni. Gwnewch yn siŵr eich bod yn rhoi’r un wybodaeth am y cyflogwyr hyn a’r gwaith a wnaethoch fel y rhoddwch yn Rhan 3.
Ffurflen BI100ODW
Pan fyddwch yn cwblhau’r ffurflen BI100ODW mae angen i chi ddweud wrthym am yr un cyflogwyr roeddech wedi dweud wrthym amdanynt yn y BI100PDW.
Ar gyfer pob cyflogwr mae angen i chi ddweud wrthym am yr offer neu’r peiriannau y gwnaethoch eu defnyddio neu weithio’n agos at rywun yn eu defnyddio.
Cysylltu â’ch cyflogwyr
Efallai y bydd angen i ni gysylltu ag unrhyw un o’r cyflogwyr rydych yn dweud wrthym amdanynt.