Guidance

Al viv dan UK ek Nasionalite britanik: gid pou bann Sagosien (Mauritian Creole translation)

Published 4 May 2023

Sa gid-la destine pou bann dimounn desandan Sagosien ki finn, ou ki pe fer aplikasion, pou gagn Nasionalite britanik e ki pe planifie pou al viv dan UK. Li aplikab pou bann sitwayin britanik. Bann dimounn ki napa sitwayin britanik ki pe al viv dan UK napa pou benefisie mem nivo soutien.

Antan ki enn sitwayin britanik ki viv dan UK, ou pou benefisie sertin tip led depi Leta britanik. Sa inklir akse avek National Health Service (NHS) (Servis Nasional Lasante) ek ledikasion primer ek segonder gratis pou bann zanfan.

Akse avek sertin led baze lor kantite letan ki finn viv dan UK. An konsekan, li posib ki ou gagn enn akse limite an term led kan ou fek ariv dan UK.

Si ou pe vinn viv dan UK, ou pou bizin pran ou prop dispozision konsernan plas kot ou pou reste, parski ou pou bizin oumem, pey pou ou lozman dan enn fitir pros. Si ou napa fer sa, ou riske vinn enn san-zabri. Pri lokasion dan UK kapav ser ek pou varye, an fonksion landrwa ki ou swazir pou viv.

Si ou elizib pou lozman sosial, li probab ki ou pou bizin atann lontan pou gagn enn plas konvenab pou lwe. Laplipar lotorite lokal ena enn long lalis datant, parfwa ki al ziska plis ki enn an.

Kestion ki poze souvan

1. Eski mo kapav al viv dan UK avan ki mo gagn Nasionalite britanik?

Si ou al UK avan ki ou finn gagn Nasionalite britanik, ou pou bizin swiv bann regleman an viger konsernan viza UK. Si ou UK san Nasionalite britanik e ki pe sispekte ki ou pou viol bann regleman an viger konsernan viza UK, kapav deport ou kan ou arive.

Si ou res dan UK san otorizasion, ou napa pou gagn akse avek travay, ni avek bann lavantaz ou servis, pandan ki pe travay lor ou aplikasion pou Nasionalite britanik.

2. Eski mo pou gagn enn paspor britanik kan mo gagn Nasionalite britanik?

Non. Ou bizin fer aplikasion separeman pou enn paspor britanik, enn fwa ki ou gagn Nasionalite.

Dekouver kouma pou apply pou enn paspor britanik.

3. Eski mo bizin peye pou enn paspor britanik?

Wi. Ala bann tarif pou paspor.

4. Eski mo bizin enn paspor britanik pou al viv dan UK?

Pou evit bann retar dan frontier UK ek risk refiz ou drwa dantre lor teritwar, bann sitwayin britanik ki pe al UK bizin swa enn paspor britanik ou enn certificate of entitlement dan enn lot paspor (par exanp morisien ou seselwa) ki zot ena.

Si ou pe al res UK, enn paspor britanik pou permet ou prouv ou lidantite, ou drwa pou viv dan UK ek ou drwa pou travay ek lwe enn plas pou reste.

5. Eski mo pou bizin pey mo (bann) biye avion an direksion UK?

Wi. Si ou anvi al viv dan UK, ou bizin oumem organiz ek pey pou ou biye avion.

6. Eski mo pou gagn enn plas pou reste kan mo ariv dan UK?

Non. Ou bizin fini fer aranzman pou ou lozman avan ou al UK.

Si ou ena lintansion rod bann lozman prive an lokasion, reflesi lor montan lokasion ki ou kapav peye. Pri lokasion dan UK kapav ser ek li varye, an fonksion landrwa kot ou swazir pou viv.

Si ou elizib pou lozman sosial, li posib ki ou pou bizin atann lontan pou gagn enn plas konvenab pou lwe. Laplipar lotorite lokal ena enn long lalis datant, parfwa ki al ziska plis ki enn an.

7. Ki pou arive si mo pena plas pou reste?

Si ou retrouv ou san-zabri dan UK, ou konsey lokal kapav donn ou konsey ek evalie si ou elizib pou gagn enn led pou lozman. Tip led ki ou pou resevwar pou depann lor ou sitiasion individiel. Si ou finn abandonn enn lakaz kot ou ti pe reste avan pou vinn viv dan UK, li posib ki ou napa pa kapav resevwar sertin tip led pou lozman.

Dekouver bann led si ou san-zabri dan UK.

8. Eski mo pou kapav gagn akse avek swin medikal kan mo arive?

Ou pou gagn akse avek NHS [Servis Nasional Lasante] gratis dan Langleter si ou enn sitwayin britanik ek enn rezidan abitiel dan United Kingdom. Pou konsider enn dimounn kouma enn rezidan abitiel, li bizin pe viv dan UK dan enn fason legal ek bien etabli pou lemoman.

Ou bizin anrezistre avek enn dokter NHS (enn dokter zeneralis) pou bann preokipasion lasante kotidien. Ou napa bizin fourni prev ladres ou stati imigrasion, ni dokiman lidantite, ou enn nimero NHS pou anrezistre avek enn dokter zeneralis.

Dekouver koman pou anrezistre avek enn dokter zeneralis dan Langleter.

Pou gagn akse avek bann servis lasante spesialize, li posib ki ou pou bizin donn fourniser swin lasante enn prev ki ou enn rezidan abitiel dan UK.

Sa gid-la aplikab pou servis medikal dan Langleter. Ena bann regleman diferan ki aplikab pou Lekos, Wales ek Irland-di-Nor.

9. Eski mo pou kapav inskrir mo (bann) zanfan dan lekol?

Dan Langleter, bann paran bizin asire ki zot zanfan resevwar enn ledikasion an full-time adekwat, ant laz 5 ek 16 an. Toutfwa, bann zanfan benefisie enn plas dan lekol ki finanse par gouvernman apartir komansman lane skoler (1 Septam) apre zot katriyem laniverser.

Ou kapav apply pou enn plas dan lekol pou ou zanfan swa kan ou arive ou avan ki ou vinn dan UK.

Pou gagn led pou trouv enn plas dan enn lekol finanse par gouvernman, ou pou bizin kontakte lekip responsab admision dan lekol, dapre konsey lokal rezion kot ou pe reste, ou planifie pou reste. Zot pou inform ou lor bann plas vakan ki ena dan bann lekol. Pou rod enn konsey lokal, servi enn UK postcode.

Sa gid-la aplikab pou gagn enn plas dan enn lekol dan Langleter. Ena bann prosesis diferan ki aplikab pou Lekos, Wales ek Irland-di-Nor.

10. Eski pou donn mwa enn travay kan mo ariv dan UK?

Non. Ou kapav rod bann travay pou apply, ek ou kapav servi servis online JobHelp pou gagn led pou trouv enn travay.

11. Eski mo bann kalifikasion pou rekonet dan UK?

Si ou ena bann kalifikasion ki napa vinn depi UK, ou kapav apply pou enn Statement of Comparability pou asire ki ou bann kalifikasion pou rekonet par bann anplwayer ek fourniser servis ledikasion dan UK.

Gouvernman UK pe finans bann fre ki aplikab pou Statement of Comparability pou bann Sagosien ki elizib. Pou fer aplikasion, ouswa pou gagn plis linformasion, kontakte [email protected].

12. Eski mo kapav amenn avek mwa, bann manb mo lafami ki napa britanik, dan UK?

Bann dimounn ki pena Nasionalite britanik e ki anvi vinn viv dan UK pou bizin swiv bann regleman an viger konsernan viza UK.