Canllawiau

Gwneud cais i dalu cyfraniadau Yswiriant Gwladol gwirfoddol pan fyddwch dramor (CF83)

Talwch Yswiriant Gwladol gwirfoddol am gyfnodau dramor.

• Gan: Cyllid a Thollau EF
• Cyhoeddwyd: 15 Ionawr 2024
• Diweddarwyd ddiwethaf: 31 Ionawr 2024 — Gweld pob diweddariad

Gallwch wneud cais i dalu cyfraniadau Yswiriant Gwladol gwirfoddol i lenwi bylchau yn eich cofnod Yswiriant Gwladol (yn agor tudalen Saesneg).

Gallwch gael cyngor ar os gallwch gael budd o dalu cyfraniadau Yswiriant Gwladol gwirfoddol. Os ydych:

• o dan oedran Pensiwn y Wladwriaeth, cysylltwch â Chanolfan Bensiwn y Dyfodol

• dros, neu o fewn 6 mis o gyrraedd, oedran Pensiwn y Wladwriaeth, cysylltwch â Chanolfan Pensiynau Rhyngwladol (yn agor tudalen Saesneg)

Mae’n bosibl yr hoffech gael cyngor ariannol cyn i chi benderfynu gwneud cyfraniadau Yswiriant Gwladol gwirfoddol. Dysgwch ragor am bensiynau ac ymddeol ar wefan Helpwr Aryan.

Cyfraniadau Yswiriant Gwladol gwirfoddol

Mae’n bosib y gallwch dalu Yswiriant Gwladol Dosbarth 2 gwirfoddol neu Ddosbarth 3 gwirfoddol am gyfnodau tramor, cyn belled â’ch bod yn bodloni’r amodau talu.

Dysgwch ragor am dalu cyfraniadau Yswiriant Gwladol gwirfoddol a pha ddosbarth i’w dalu yn yr arweiniad ynghylch nawdd cymdeithasol dramor: NI38.

Ni allwch dalu cyfraniadau Yswiriant Gwladol Dosbarth 2 na Dosbarth 3 gwirfoddol am unrhyw gyfnod pan fyddwch yn agored i dalu cyfraniadau Yswiriant Gwladol Dosbarth 1.

Dysgwch am pa fudd-daliadau a phensiynau y mae cyfraniadau Yswiriant Gwladol yn cyfrif tuag atynt.

Cyn i chi wneud cais

Cyn i chi wneud cais, dylech wirio eich cymhwystra i dalu.

Os ydych yn byw dramor, yn gweithio dramor, neu’n byw ac yn gweithio dramor, mae’n bosibl y gallwch dalu cyfraniadau Yswiriant Gwladol Dosbarth 2 gwirfoddol neu Ddosbarth 3 gwirfoddol os ydych naill ai:

• wedi byw yn y DU am 3 blynedd yn olynol
• wedi talu o leiaf 3 blynedd o gyfraniadau

Os ydych wedi byw neu dalu cyfraniadau nawdd cymdeithasol mewn gwlad yn yr UE, Gwlad yr Iâ, Liechtenstein, Norwy, y Swistir neu Dwrci

Mae’n bosibl y gallwch dalu cyfraniadau Yswiriant Gwladol Dosbarth 2 gwirfoddol neu Ddosbarth 3 gwirfoddol os ydych naill ai:

• wedi byw mewn gwlad yn yr UE, Gwlad yr Iâ, Liechtenstein, Norwy, y Swistir neu Dwrci am 3 blynedd yn olynol
• wedi talu cyfraniadau nawdd cymdeithasol am 3 blynedd mewn gwlad yn yr UE, Gwlad yr Iâ, Liechtenstein, Norwy, y Swistir neu Dwrci

Mae’n rhaid eich bod wedi bod yn destun deddfwriaeth y DU o’r blaen hefyd oherwydd eich bod yn gyflogedig neu’n hunangyflogedig.

Er enghraifft, rydych yn flaenorol:

• wedi talu cyfraniadau Yswiriant Gwladol Dosbarth 1 neu bod y cyfraniadau hynny yn cael eu trin fel pe baent wedi’u talu
• wedi talu cyfraniadau Yswiriant Gwladol Dosbarth 2 neu bod y cyfraniadau hynny yn cael eu trin fel pe baent wedi’u talu

Mae’n rhaid i chi wneud cais drwy’r post i dalu cyfraniadau Yswiriant Gwladol gwirfoddol os ydych wedi talu cyfraniadau nawdd cymdeithasol am 3 mlynedd mewn gwlad yn yr UE, Gwlad yr Iâ, Liechtenstein, Norwy, y Swistir neu Dwrci.

I dalu cyfraniadau Yswiriant Gwladol Dosbarth 2 gwirfoddol, rhaid i chi fod yn gweithio neu wedi gweithio dramor yn ystod y cyfnod rydych yn gwneud cais amdano i’w talu ac wedi gweithio yn y DU yn union cyn gadael.

Gallwch wirio categorïau a chyfraddau Yswiriant Gwladol (yn agor tudalen Saesneg) presennol.

Yr hyn y bydd ei angen arnoch

Bydd angen y canlynol arnoch i wneud cais:

• enw llawn
• dyddiad geni
• rhif Yswiriant Gwladol — dod o hyd i’ch rhif Yswiriant Gwladol os ydych wedi’i golli
• eich cyfeiriad yn y DU, os yw’n berthnasol
• eich cyfeiriad dramor, os yw’n berthnasol
• y dyddiad y gwnaethoch adael y DU
• manylion o’ch statws cyflogaeth cyn i chi adael y DU
• pa mor hir y gwnaethoch fyw neu’n bwriadu byw dramor, os ydych yn gwybod
• manylion eich cyflogaeth neu’ch hunangyflogaeth dramor, os yw’n berthnasol
• manylion unrhyw fudd-dal gan y llywodraeth roeddech chi’n ei gael neu’n ei hawlio, os yw’n berthnasol

Os ydych yn gwneud cais ar-lein bydd angen ffôn gyda chamera sy’n gweithio. Bydd hefyd angen un o’r mathau canlynol o ID ffotograffig arnoch:

• trwydded yrru cerdyn-llun yn y DU
• pasbort y DU
• pasbort nad yw o’r DU sydd â sglodyn biometrig
• trwydded breswylio fiometrig y DU (BRP)
• cerdyn preswylio biometrig y DU (a elwir hefyd yn BRC)
• trwydded gweithiwr trawsffiniol y DU (FWP)

Os ydych yn gwneud cais i dalu cyfraniadau Yswiriant Gwladol gwirfoddol am sawl cyfnod, mae angen yr wybodaeth hon am bob cyfnod.

Rhwng Tachwedd 2017 ac Ebrill 2019, roedd arweiniad CThEF yn anghywir. Os na wnaethoch gais neu os gwrthodwyd eich cais o ganlyniad i’r arweiniad anghywir, mae’n bosibl y byddwch yn gallu talu ar y cyfraddau gwreiddiol. Gallwch roi manylion os ydych yn credu y gallai fod wedi effeithio arnoch pan fyddwch yn gwneud cais ar-lein neu drwy lythyr eglurhaol wrth wneud cais drwy’r post.

Ffyrdd o wneud cais

Gwneud cais ar-lein

Mae angen Dynodydd Defnyddiwr (ID) a chyfrinair ar gyfer Porth y Llywodraeth arnoch. Os nad oes gennych Ddynodydd Defnyddiwr, gallwch greu un pan fyddwch yn gwneud cais.

Gwneud cais drwy’r post

1. Casglwch eich holl wybodaeth at ei gilydd cyn i chi ddechrau. Byddwch yn llenwi’r ffurflen hon ar-lein ac ni allwch gadw’ch cynnydd.

2. Llenwch ffurflen CF83.

3. Argraffwch y ffurflen a’i hanfon drwy’r post at CThEF gan ddefnyddio’r cyfeiriad post a ddangosir ar y ffurflen.

Rhaid i chi wneud cais drwy’r post i dalu cyfraniadau Yswiriant Gwladol gwirfoddol am fylchau yn y flwyddyn dreth gyfredol ac wrth symud ymlaen drwy Ddebyd Uniongyrchol.

Gweithwyr Datblygu Gwirfoddol

Os ydych yn weithiwr Datblygu Gwirfoddol bydd angen i chi wneud y canlynol:

• argraffu ac anfon y ffurflen wedi’i llenwi i’ch sefydliad recriwtio
• rhoi gwybod am eich enillion at ddibenion cyfraniadau Yswiriant Gwladol — gan gynnwys pob lwfans mewn arian parod a dalwyd gan eich cyflogwr, ond peidiwch â chynnwys buddiannau na lwfansau mewn arian parod sydd heb eu talu gan eich cyflogwr

Os yw’ch cyflogwr yn talu eich cyfraniadau Yswiriant Gwladol gwirfoddol

Os yw’ch cyflogwr yn talu eich cyfraniadau Yswiriant Gwladol gwirfoddol ar eich rhan, bydd angen i chi argraffu ac anfon y ffurflen wedi ei llenwi drwy’r post.

Yr hyn sy’n digwydd nesaf

Os cymeradwyir eich cais i dalu cyfraniadau Yswiriant Gwladol gwirfoddol dramor, byddwn yn ysgrifennu atoch i roi gwybod i chi a chadarnhau dyddiadau a symiau talu neu efallai y byddwn yn gofyn am ragor o wybodaeth.

Dysgwch ragor am bryd y gallwch ddisgwyl ateb gan CThEF.

Gallwch gysylltu ag ymholiadau Yswiriant Gwladol CThEF os oes gennych unrhyw gwestiynau pellach am dalu cyfraniadau Yswiriant Gwladol a byw dramor.

Rhagor o wybodaeth 

Efallai y byddwch eisiau gwirio’r arweiniad canlynol:

• Treth os byddwch yn gadael y DU i fyw dramor (yn agor tudalen Saesneg)
• Treth ar eich incwm yn y DU os ydych yn byw dramor (yn agor tudalen Saesneg)
• Yswiriant Gwladol os ydych yn gweithio dramor
• Symud neu ymddeol dramor (yn agor tudalen Saesneg)
• Pensiwn y Wladwriaeth os ydych yn ymddeol dramor (yn agor tudalen Saesneg)
• Cyngor i ddinasyddion y DU sy’n byw dramor, gan gynnwys statws preswylio, iechyd a budd-daliadau (yn agor tudalen Saesneg)
• Gwneud cais am rif Yswiriant Gwladol os nad ydych wedi cael un o’r blaen

Cyhoeddwyd ar 15 Ionawr 2024
Diweddarwyd ddiwethaf ar 31 Ionawr 2024 + show all updates

1. 31 Ionawr 2024

   You can now apply to pay voluntary National Insurance contributions online. Information has been added on paying voluntary National Insurance contributions if you've lived or paid social security contributions in an EU country, Iceland, Liechtenstein, Norway, Switzerland or Turkey. Information has been added on what to do if your employer is paying your voluntary National Insurance contributions.

2. 15 Ionawr 2024

   Added translation