Help ar-lein ar gyfer Hunanasesiad
Sut i gael help gyda Hunanasesiad gan CThEF drwy ddefnyddio ein cynorthwyydd digidol, fforymau cymunedol, fideos YouTube ac offerynnau ar-lein.
Fel arfer, mae’n gynt, yn haws ac yn rhatach i ddefnyddio gwasanaethau ar-lein CThEF yn hytrach na chodi’r ffôn.
Os na allwch ddefnyddio ein gwasanaethau ar-lein, gallwch ddysgu sut i gael help gan CThEF os oes angen cymorth ychwanegol arnoch.
Gofyn am help ar-lein
Gallwch ddefnyddio cynorthwyydd digidol CThEF (sy’n wasanaeth Saesneg yn unig) os oes angen i chi ofyn rhagor o gwestiynau am Hunanasesiad, neu os oes gennych ymholiad penodol. Gallwch hefyd ofyn i gael siarad ag ymgynghorydd os oes un ar gael.
Gallwch hefyd ofyn cwestiynau drwy’r dulliau canlynol:
- fforwm cymunedol Hunanasesiad CThEF (yn agor tudalen Saesneg) — postiwch unrhyw gwestiynau sydd gennych, cael ateb, a darllen cwestiynau tebyg sydd eisoes wedi’u hateb
- Cymorth Cwsmeriaid CThEF ar X (Twitter) (yn agor tudalen Saesneg) — am gwestiynau cyffredin am Hunanasesiad (peidiwch â chynnwys unrhyw wybodaeth bersonol nac ariannol yn eich neges)
Defnyddio gwasanaethau ar-lein CThEF
Gallwch fewngofnodi i’ch cyfrif treth personol neu’ch cyfrif treth busnes i wirio’ch cofnodion ac i reoli’ch manylion.
Gwylio fideos a gweminarau a defnyddio pecynnau cymorth CThEF
Bwriwch olwg dros y diweddaraf yn ein diweddariadau drwy e-bost, ein fideos a’n gweminarau ar gyfer Hunanasesiad (yn agor tudalen Saesneg) er mwyn cael gwybod sut i wneud y canlynol:
- gwylio fideos Hunanasesiad CThEF ar YouTube
- cofrestru ac ymuno â gweminarau byw, gofyn cwestiwn yn y sgwrs a chael ateb gan un o’n harbenigwyr
- defnyddio ein pecynnau cymorth i’ch helpu i lenwi’ch Ffurflen Dreth Hunanasesiad
Defnyddio offerynnau ar-lein
Gallwch wneud y canlynol:
- gwirio a oes angen i chi anfon Ffurflen Dreth Hunanasesiad — defnyddiwch yr offeryn hwn i’ch helpu i benderfynu a oes angen i chi lenwi Ffurflen Dreth, i fwrw golwg dros y camau i’w cymryd nesaf, ac i gael at gysylltiadau i arweiniad defnyddiol
- gwirio sut i gofrestru ar gyfer Hunanasesiad — defnyddiwch yr offeryn hwn i ddysgu sut i gofrestru ar gyfer Hunanasesiad, ac i gael at gysylltiadau i arweiniad defnyddiol
- gwirio pryd y gallwch ddisgwyl ateb — os ydych eisoes wedi cysylltu â ni, dysgwch pryd y gallwch ddisgwyl cael ateb (dim ond ar ôl y dyddiad hwnnw y dylech gysylltu â ni, gan ein bod yn brysur yn delio â cheisiadau)
- defnyddio’r gyfrifiannell dreth ar gyfer pobl hunangyflogedig i’ch helpu i amcangyfrif eich bil treth Hunanasesiad nesaf
- cyfrifo’ch elw trosiannol (yn agor tudalen Saesneg) — os ydych yn cael eich effeithio gan y sail blwyddyn dreth newydd (Diwygio’r Cyfnod Sail), defnyddiwch yr offeryn hwn ar gyfer blwyddyn dreth 2023 i 2024
Gallwch hefyd ddefnyddio ein harweiniad ynghylch cael help â Hunanasesiad i ddysgu sut i wneud y canlynol:
- cofrestru ar gyfer Hunanasesiad
- dod o hyd i’ch Cyfeirnod Unigryw y Trethdalwr
- llenwi’ch Ffurflen Dreth Hunanasesiad
- deall eich bil treth Hunanasesiad
- talu’ch bil treth Hunanasesiad
- dod o hyd i’ch manylion mewngofnodi coll
Cael gafael ar ap CThEF
Gallwch lawrlwytho ap CThEF ar ddyfais symudol (er enghraifft, eich ffôn neu dabled) a’i ddefnyddio er mwyn:
- gwirio faint o dreth Hunanasesiad sydd arnoch
- gwneud taliad
- gosod nodyn atgoffa i wneud taliad Hunanasesiad
- dod o hyd i’ch Cyfeirnod Unigryw y Trethdalwr (UTR) ar gyfer Hunanasesiad
- diweddaru’ch cyfeiriad post
- dewis i CThEF gysylltu â chi yn electronig, yn hytrach na drwy lythyr
- dilyn trywydd y ffurflenni a’r llythyrau rydych wedi’u hanfon atom
- hawlio ad-daliadau