Sut y gall strwythur eich busnes gael effaith ar eich cymhwystra i gael Rhyddhad i Gynhyrchydd Bach
Dysgwch sut i gyfrifo’ch cynhyrchiad blynyddol o alcohol os ydych yn rhan o grŵp, neu os ydych yn uno â busnes arall neu’n gwahanu oddi wrtho.
Os ydych yn rhannu safleoedd mewn grŵp
Mae’n rhaid i chi sicrhau bod eich cynhyrchiad blynyddol cyfunol o alcohol yn dod i 4,500 hectolitr neu lai.
-
Cyfrifwch y cynnyrch blynyddol o alcohol pur ar gyfer pob safle yn y grŵp.
-
Adiwch y cyfansymiau hyn at ei gilydd er mwyn cadarnhau eich bod yn bodloni’r trothwy o 4,500 hectolitr.
Os nad ydych yn siŵr p’un a ydych yn rhannu safleoedd mewn grŵp neu beidio
Rydych yn rhannu safleoedd mewn grŵp os yw cynhyrchydd arall, sy’n gysylltiedig â chi, yn gwneud cynhyrchion ar eich safle chi yn ogystal â gwneud cynhyrchion ar ei safle’i hun.
Mae sawl ffordd o fod yn gysylltiedig, gan gynnwys:
- perthnasau rhwng pobl, er enghraifft:
- perthnasau teuluol
- partneriaethau busnes
- perthnasau rhwng busnesau, er enghraifft, os oes gennych reolaeth dros:
- un neu fwy o’r busnesau
- un o’r busnesau, a bod gan aelod o’ch teulu reolaeth dros y llall
Os ydych yn uno’ch busnes â busnes arall
Mae’n bosibl y gallwch gael rhyddhad trosiannol am 3 blynedd ar ôl i chi uno ag 1 neu fwy o fusnesau.
Gelwir y 3 blynedd hyn yn ‘blynyddoedd trosiannol’, ac maent yn cynnwys:
- y flwyddyn gynhyrchu pan wnaeth eich busnesau uno
- 2 flynedd gynhyrchu gyfan ar ôl uno
Bydd yn rhaid i chi gyfrifo swm o gynhyrchiad sydd wedi’i addasu ar gyfer y busnesau sydd newydd eu huno, a hynny ar gyfer pob blwyddyn drosiannol.
Cymhwystra i gael rhyddhad trosiannol
Ni allwch gael rhyddhad trosiannol os ydych yn ymuno ag unrhyw fusnes nad yw’n gymwys i gael Rhyddhad i Gynhyrchydd Bach ar ei ben ei hun.
Ar gyfer y 3 blynedd gynhyrchu, mae’n rhaid i chi hefyd sicrhau’r canlynol:
- nid yw’r swm o gynhyrchiad sydd wedi’i addasu yn cynnwys fwy na 4,500 hectolitr o alcohol pur
- o’r alcohol a gynhyrchwyd yn ystod y flwyddyn flaenorol gan bob set o safleoedd yn y grŵp (ar ôl uno), roedd llai na hanner o’r cynhyrchion hynny wedi’u gwneud o dan drwydded
Sut i gyfrifo’ch swm o gynhyrchiad sydd wedi’i addasu
Mae’n rhaid i chi gyfrifo’r swm o gynhyrchiad sydd wedi’i addasu ar gyfer pob blwyddyn drosiannol fel a ganlyn.
Blwyddyn 1
Blwyddyn 1 yw’r flwyddyn gynhyrchu pan unodd y busnesau.
I gael eich swm o gynhyrchiad sydd wedi’i addasu, mae’n rhaid i chi ddefnyddio swm o gynhyrchiad safle’r cynhyrchydd mwyaf ar gyfer y flwyddyn gynhyrchu cyn uno.
Bydd angen y ffigur hwn arnoch i gyfrifo’ch swm o gynhyrchiad sydd wedi’i addasu ar gyfer Blwyddyn 2 a Blwyddyn 3 hefyd.
Blwyddyn 2
Dyma sut i gael y swm o gynhyrchiad sydd wedi’i addasu ar gyfer Blwyddyn 2:
-
Tynnwch eich swm o gynhyrchiad sydd wedi’i addasu ar gyfer Blwyddyn 1 o swm o gynhyrchiad go iawn y busnes sydd wedi uno ar gyfer Blwyddyn 1.
-
Lluoswch eich ateb ag un traean.
-
Adiwch eich ateb a’ch swm o gynhyrchiad sydd wedi’i addasu ar gyfer Blwyddyn 1.
Blwyddyn 3
Dyma sut i gael y swm o gynhyrchiad sydd wedi’i addasu ar gyfer Blwyddyn 3:
-
Tynnwch eich swm o gynhyrchiad sydd wedi’i addasu ar gyfer Blwyddyn 1 o swm o gynhyrchiad go iawn y busnes sydd wedi uno ar gyfer Blwyddyn 2.
-
Lluoswch eich ateb â dau draean.
-
Adiwch eich ateb a’ch swm o gynhyrchiad sydd wedi’i addasu ar gyfer Blwyddyn 1.
Ar ôl y drydedd flwyddyn drosiannol, bydd yn rhaid i chi ddefnyddio’ch symiau o gynhyrchiad go iawn er mwyn cyfrifo’ch cyfradd is.
Enghraifft o sut i gyfrifo swm o gynhyrchiad sydd wedi’i addasu
Mae busnes A yn uno â busnes B i greu busnes C.
Yn ystod y flwyddyn gynhyrchu cyn uno, gwnaeth busnes A gynhyrchu 1,000 hectolitr o alcohol pur, a gwnaeth busnes B gynhyrchu 500 hectolitr o alcohol pur.
Swm busnes C o gynhyrchiad sydd wedi’i addasu yw 1,000 hectolitr ar gyfer Blwyddyn 1.
Swm busnes C o gynhyrchiad go iawn yw 1,700 ar gyfer Blwyddyn 1.
Dyma sut i gael y swm o gynhyrchiad sydd wedi’i addasu ar gyfer Blwyddyn 2:
-
Cyfrifwch (1,700 – 1,000) × (1 ÷ 3) = 233 hectolitr.
-
Adiwch eich ateb a’r swm o gynhyrchiad sydd wedi’i addasu ar gyfer Blwyddyn 1 (233 + 1,000) = 1,233 hectolitr.
Swm busnes C o gynhyrchiad go iawn yw 1,900 ar gyfer Blwyddyn 2.
Dyma sut i gael y swm o gynhyrchiad sydd wedi’i addasu ar gyfer Blwyddyn 3:
-
Cyfrifwch (1,900 – 1,000) × (2 ÷ 3) = 600 hectolitr
-
Adiwch eich ateb a’r swm o gynhyrchiad sydd wedi’i addasu ar gyfer Blwyddyn 1 (600 + 1,000) = 1,600 hectolitr.
| Blwyddyn drosiannol Busnes C |
Swm o gynhyrchiad sydd wedi’i addasu (alcohol pur) mewn hectolitrau |
|---|---|
| 1 | 1,000 hectolitr |
| 2 | 1,233 hectolitr |
| 3 | 1,600 hectolitr |
Cyfnod pontio yn dod i ben yn gynnar
Bydd eich cyfnod pontio yn dod i ben yn gynnar os mae’r canlynol yn digwydd:
- mae swm go iawn yr alcohol a gynhyrchwyd yn ystod blwyddyn gynhyrchu ar draws pob un o safleoedd y busnesau sydd wedi’u huno yn llai na’r swm addasedig ar gyfer yr un cyfnod
- rydych yn uno â chynhyrchydd bach arall yn ystod y cyfnod pontio
Os ydych yn uno â busnes arall yn ystod y cyfnod pontio
Os ydych yng nghanol cyfnod pontio ac yn uno â chynhyrchydd bach arall, bydd y cyfnod pontio cyntaf yn dod i ben.
Os ydych yn bodloni’r amodau cymhwystra, gallwch ddechrau cyfnod pontio newydd o’r dyddiad uno newydd.
Os ydych yn uno â 2 neu fwy o gynhyrchwyr bach eraill ar yr un adeg
I gyfrifo’r swm sydd wedi’i addasu ar gyfer y busnesau sydd wedi’u huno, mae’n rhaid i chi wybod pa gynhyrchydd yw’r mwyaf.
Y cynhyrchydd mwyaf yw’r cynhyrchydd a wnaeth y mwyaf o alcohol ar ei safle yn ystod y flwyddyn cyn i’r uno ddigwydd.
Os gwnaeth 2 gynhyrchydd neu fwy yr un faint o alcohol, gall unrhyw un o’r cynhyrchwyr hynny gael ei ystyried fel y cynhyrchydd mwyaf.
Os ydych yn gwahanu’ch busnes oddi wrth fusnes arall
Bydd eich cynhyrchiad blynyddol o alcohol ar gyfer y flwyddyn cyn gwahanu’n cael ei gyfrif yn ‘dim’.
Mae’n rhaid i chi amcangyfrif eich cynhyrchiad ar gyfer y flwyddyn gynhyrchu bresennol er mwyn ailgyfrifo’ch cyfradd i gynhyrchydd bach. Mae’ch amcangyfrif yn cael ei ddefnyddio fel eich ffigur blynyddol o ran cynhyrchiad ar gyfer y flwyddyn bresennol.
Ni fyddwch yn gymwys i gael rhyddhad trosiannol os byddwch yn ail-uno â’r un busnesau o fewn 7 mlynedd o wahanu oddi wrthynt.