Adfer diogelwch lwfans oes eich pensiwn
Os ydych wedi colli’ch diogelwch lwfans oes o ganlyniad i unioni’r pensiwn gwasanaeth cyhoeddus (a elwir hefyd yn McCloud), efallai y byddwch yn gallu ei adfer.
Mae’r dudalen hon ar gyfer pobl sydd â naill ai:
- wedi colli eu diogelwch lwfans oes o ganlyniad i unioni’r pensiynau gwasanaeth cyhoeddus ac am ei adfer
- dyddiad colled wedi’i ddiweddaru yn dilyn yr unioni
Darganfyddwch sut i wneud cais am ddiogelwch lwfans oes os ydych yn meddwl eich bod yn gymwys o ganlyniad i’r unioni.
Pwy all wneud cais
I fod yn gymwys i adfer eich diogelwch lwfans oes, mae’n rhaid eich bod wedi:
- bod yn aelod o gynllun pensiwn gwasanaeth cyhoeddus rhwng 1 Ebrill 2015 a 31 Mawrth 2022
- cael gwasanaeth pensiynadwy ar 31 Mawrth 2012
- colli eich diogelwch lwfans oes o ganlyniad i unioni’r pensiynau gwasanaeth cyhoeddus
- cael naill ai:
- Diogelwch Uwch
- Diogelwch Penodol
- Diogelwch Penodol 2014
- Diogelwch Penodol 2016
Cyn i chi ddechrau
I wneud cais i adfer eich diogelwch lwfans oes, bydd angen y canlynol arnoch:
- cyfeirnod y diogelwch a gollwyd (dim ond un diogelwch a gollwyd y gallwch wneud cais i’w adfer)
- manylion y cynllun pensiwn gwasanaeth cyhoeddus yr ydych yn aelod ohono, gan gynnwys enw’r cynllun a chyfeirnod treth y cynllun pensiwn (PSTR)
- y dyddiad colled wedi’i ddiweddaru, os nad yw’r dyddiad a roesoch yn flaenorol i CThEF yn gywir mwyach
- eich rhif Yswiriant Gwladol
Gwneud cais i adfer eich lwfans oes
-
Casglwch eich holl wybodaeth at ei gilydd cyn i chi ddechrau. Byddwch yn llenwi’r ffurflen hon ar-lein ac ni allwch gadw’ch cynnydd.
-
Llenwch y ffurflen i adfer eich lwfans oes.
-
Argraffwch y ffurflen a’i hanfon drwy’r post i CThEF gan ddefnyddio’r cyfeiriad post a ddangosir ar ddiwedd y ffurflen.
Ar ôl i chi wneud cais
Byddwn yn ysgrifennu atoch i roi gwybod i chi pan fydd eich lwfans oes wedi’i adfer. Gallai’r llythyr gynnwys cyfeirnod newydd pe bai un wedi’i greu.
Os byddwn yn anfon cyfeirnod newydd atoch, mae’n rhaid i chi ei roi i weinyddwr eich cynllun pensiwn.
Os gwnaethoch ddweud wrthym am ddyddiad colled newydd, byddwn yn anfon llythyr atoch i roi gwybod i chi a yw hwn wedi’i ddiweddaru.
Colli eich diogelwch
Os byddwn yn adfer eich diogelwch lwfans oes, bydd angen i chi fodloni’r amodau o’r dyddiad y dechreuodd y diogelwch yn wreiddiol.
Bydd angen i chi wirio’r amodau ar gyfer colli diogelwch lwfans oes (yn Saesneg), yn dibynnu ar ba ddiogelwch sydd gennych.