Tâl Salwch Statudol (SSP)
Yr hyn y byddwch yn ei gael
Os ydych yn gymwys, gallwch gael £116.75 o Dâl Salwch Statudol (SSP) yr wythnos am hyd at 28 wythnos.
Cewch SSP wedi’i dalu i chi ar gyfer yr holl ddiwrnodau yr ydych i ffwrdd o’r gwaith yn sâl a byddech wedi’u gweithio fel arfer, oni bai am y 3 diwrnod cyntaf.
Dim ond os cawsoch SSP yn ystod yr 8 wythnos diwethaf y cewch SSP wedi’i dalu i chi ar gyfer y 3 diwrnod gwaith cyntaf y byddwch i ffwrdd o’r gwaith yn sâl. Mae’n rhaid i hwn gynnwys cyfnod aros o 3 diwrnod cyn y cafodd SSP ei dalu i chi.
Sut cewch eich talu
Telir SSP gan eich cyflogwr yn yr un ffordd ag y telir eich cyflog arferol, er enghraifft fesul wythnos neu fis.
Os oes gennych fwy nag un swydd, efallai y cewch SSP gan bob cyflogwr.
Bydd Treth ac Yswiriant Gwladol yn cael eu didynnu.
Os ydych o’r farn nad ydych yn cael y swm cywir o SSP, dylech gael gair gyda’ch cyflogwr. Os ydych yn dal i fod yn anfodlon, cysylltwch â Gwasanaeth Cwsmeriaid Cymraeg CThEF.