Sicrhewch wiriad yr heddlu ar rywun sydd â chysylltiad â phlentyn

Gallwch ofyn i’r heddlu wirio a oes gan rywun sy’n dod i gysylltiad â phlentyn gofnod o droseddau rhywiol.

Mae ‘cyswllt’ yn golygu bod gan y person ddigon o fynediad at blentyn penodol i beri risg gwirioneddol o niwed. Er enghraifft:

• maent yn byw gyda’r plentyn
• maent yn gweithio ar aelwyd y plentyn
• maent yn siarad â’r plentyn ar-lein neu dros y ffôn
• gallent gwrdd â’r plentyn heb oruchwyliaeth trwy fynediad i fannau cyffredin a rennir, megis gerddi neu goridorau, neu drwy berthynas â theulu’r plentyn

Ffoniwch 999 os credwch fod y plentyn mewn perygl uniongyrchol.

Nid oes rhaid i chi fod yn berthynas i’r plentyn yr ydych yn pryderu amdano i ofyn am wiriad.

Mae’r canllaw hwn hefyd ar gael yn Saesneg (English).

Sut i ofyn am wiriad yr heddlu

Gallwch chi:

• ffonio 101
• mynd i orsaf heddlu leol

Yn dibynnu ar ble rydych yn byw, efallai y byddwch hefyd yn gallu gofyn drwy ffurflen ar-lein. Chwiliwch am eich heddlu lleol i weld a ydynt yn cynnig y gwasanaeth hwn.

Pan fyddwch yn gofyn am siec, bydd angen i chi:

• roi eich enw a’ch manylion cyswllt i’r heddlu (ni allwch wneud cais yn ddienw)
• dweud pam eich bod am i’r person gael ei wirio
• esbonio beth yw eich perthynas â’r plentyn

Faint o amser mae’n ei gymryd

Gall gymryd hyd at 45 diwrnod i’r heddlu orffengwiriad. Os yw’r plentyn mewn perygl uniongyrchol, yna bydd yr heddlu’n gweithredu ar unwaith cyn i’r gwiriad ddod i ben.

Beth sydd angen i chi ei wneud ar ôl gofyn am y gwiriad

Yn y 24 awr gyntaf ar ôl i chi ofyn am wiriad, bydd yr heddlu yn gweithio gyda chi i ddod o hyd i ffordd ddiogel o gadw mewn cysylltiad.

O fewn 10 diwrnod o ofyn am wiriad, bydd angen i chi fynychu cyfarfod neu gael galwad gyda’r heddlu i:

• dangos prawf o bwy ydych a’ch cyfeiriad, megis pasbort, trwydded yrru, bil cyfleustodau cartref neu gyfriflen banc
• dangos prawf o’ch perthynas â’r plentyn, megis tystysgrif geni neu gofnod iechyd plentyn personol (llyfr coch)
• caniatáu i’r heddlu ganfod rhagor o fanylion

Os na all yr heddlu gadarnhau pwy ydych, ni ellir dweud wrthych beth yw canlyniadau’r gwiriad. Bydd yr heddlu yn dal i weithredu i gadw’r plentyn yn ddiogel.

Pwy fydd yn cael gwybod am y gwiriad

Os yw’r heddlu wedi dod o hyd i unrhyw wybodaeth berthnasol, byddant yn penderfynu pwy sydd angen gwybod. Efallai nad chi fydd hwn.

Fel arfer dyma’r bobl sydd yn y sefyllfa orau i amddiffyn y plentyn, megis rhiant, gwarcheidwad neu ofalwr y plentyn.

Bydd yr heddlu fel arfer yn dweud wrth y sawl a wiriwyd eu bod yn rhannu’r wybodaeth hon, os byddant yn penderfynu ei bod yn ddiogel gwneud hynny. Gallai hyn gynnwys dweud wrth y person y gwnaethoch ofyn am y gwiriad yn ei gylch. Bydd yr heddlu yn siarad â chi wrth wneud y penderfyniad hwn.

Os yw’r heddlu am rannu gwybodaeth gyda chi

Bydd yr heddlu ond yn rhannu gwybodaeth gyda chi os byddwch yn llofnodi cytundeb yn addo peidio â dweud wrth neb arall.

Os credwch fod yna bobl eraill y dylid dweud wrthynt, gofynnwch i’r heddlu am hyn.