Newid eich manylion neu gadael y Cynllun Dilysu Diodydd Gwirodol

Question

Accepted Answer

Newid eich manylion

Cysylltwch â’r Uned Dilysu Diodydd Gwirodol drwy e-bostio enquiries.sdvs@hmrc.gov.uk i newid eich manylion.

Bydd angen i chi roi gwybod i CThEF ynghylch unrhyw fanylion anghywir neu os oes newidiadau i’ch:

cyfeiriad
enw masnachu
manylion cyswllt
endid cyfreithiol
manylion y safle

Tynnu’n ôl o’r cynllun dilysu

Bydd angen i chi roi gwybod i CThEF os ydych am dynnu’n ôl o’r cynllun, oherwydd nad ydych bellach yn gwneud y canlynol:

gweithredu fel mewnforiwr swmp wedi’i ddilysu gyfer Wisgi Albanaidd
gweithredu prosesau cynhyrchu wedi’u dilysu ar gyfer Wisgi Albanaidd, Wisgi Gwyddelig, Hufen Gwyddelig, Wisgi Tatws Gwyddelig, Brandi Seidr Gwlad yr Haf neu Wisgi Cymreig Brag Sengl

I dynnu’n ôl o’r cynllun, e-bostiwch enquiries.sdvs@hmrc.gov.uk gan gadarnhau’r canlynol:

y dyddiad rydych am adael
y rhesymau pam nad oes bellach angen i chi gael dilysiad ar ôl y dyddiad hwnnw

Ni fyddwch yn cael ad-daliad os byddwch yn tynnu’n ôl o’r Cynllun Dilysu yn ystod y flwyddyn. Codir ffioedd i adfer y costau o gynnal ymweliadau dilysu, felly ni fyddwch yn cael ad-daliad am ffioedd sydd eisoes wedi’u talu.

Ar ôl i chi adael y cynllun

Bydd CThEF yn dileu unrhyw gyfleusterau cynhyrchu neu fewnforwyr swmp sy’n gysylltiedig â’r cais sydd wedi’i dynnu o’r gwasanaeth chwilio (yn Saesneg) ar ddiwedd y cylch dilysu.

Ar ôl i chi adael:

yn gyfreithiol, ni fyddwch bellach yn gallu cynhyrchu’r diodydd gwirodol perthnasol sydd â Dynodiad Daearyddol Gwarchodedig ― bydd hyn hefyd yn effeithio ar unrhyw gynhyrchion y byddwch yn eu prosesu ar ran eich cwsmeriaid ar ôl y dyddiad hwn
os byddwch yn cynhyrchu diodydd gwirodol sydd â Dynodiad Daearyddol Gwarchodedig ar ôl i’ch dilysiad ddod i ben, efallai y byddwch chi neu’ch cwsmer yn agored i gamau gorfodi ― gall CThEF drosglwyddo gwybodaeth i’r awdurdodau dynodedig, lle bo’n briodol
gallwch osod ar y farchnad unrhyw gynhyrchion a gynhyrchwyd o dan y cynllun cyn i chi dynnu’n ôl
bydd unrhyw frandiau sydd wedi’u dilysu y gwnaethoch eu cynhyrchu cyn tynnu’n ôl o’r cynllun yn parhau i fod yn ddilys. Ar ddiwedd y cylch gwirio, bydd y brand yn parhau ar restr CThEF o frandiau sydd wedi’u dilysu, ond bydd yn dangos y dyddiad pan nad yw bellach yn frand sydd wedi’i ddilysu
bydd unrhyw gyflenwadau o’r brand a ddilysir cyn tynnu’n ôl o’r cynllun yn parhau yn wirodydd dilys â Dynodiad Daearyddol Gwarchodedig
bydd unrhyw gyfleusterau cynhyrchu sy’n gysylltiedig â’r cais sydd wedi’i dynnu’n ôl yn cael eu dileu o’r gwasanaeth chwilio ar ddiwedd y cylch dilysu
bydd unrhyw fewnforwyr swmp sy’n gysylltiedig â’r un sydd wedi tynnu’n ôl o’r cynllun yn cael eu dileu o’r rhestr o fewnforwyr swmp dilys yn y gwasanaeth chwilio ar ddiwedd y cylch dilysu. O ganlyniad, ni fydd y mewnforwyr swmp yn gallu mewnforio cyflenwadau pellach o Wisgi Albanaidd

Dylech sicrhau eich bod yn rhoi gwybod i’ch cwsmeriaid am unrhyw newidiadau gallai effeithio arnynt. Mae hyn oherwydd y gall statws eich cyfleusterau effeithio ar statws y cynhyrchion yr ydych yn eu prosesu i’ch cwsmeriaid.

Trosglwyddo cyfleusterau cynhyrchu i gynhyrchydd arall

Os yw’r perchennog newydd eisoes wedi’i ddilysu

Bydd CThEF yn cysylltu â’r perchennog newydd i gadarnhau manylion y caffaeliad ac i ddiweddaru cofnodion y person neu’r busnes i ddangos caffaeliad y cyfleusterau cynhyrchu.

Bydd y cyfleusterau cynhyrchu sydd newydd eu caffael yn cadw eu statws o fod wedi’u dilysu am weddill y cylch dilysu cyfredol ar yr amod:

bod y gweithredwr blaenorol wedi rhoi gwybod i CThEF am y trosglwyddiad
bod o leiaf 6 mis yn weddill o’r cylch dilysu cyfredol

Os nad yw’r perchennog newydd wedi’i ddilysu

Mae’n rhaid iddo wneud cais i gael ei ddilysu cyn pen 6 mis o gaffael y cyfleusterau cynhyrchu. Os na fydd yn gwneud hyn, bydd y prosesau’n colli eu statws sicr.

Newid eich manylion neu gadael y Cynllun Dilysu Diodydd Gwirodol