Treuliau symlach os ydych yn hunangyflogedig
Byw yn eich safle busnes
Mae nifer fach o fusnesau yn defnyddio eu safle busnes fel eu cartref, er enghraifft gwesty, gwely a brecwast neu gartref gofal bychan.
Gallwch ddefnyddio treuliau symlach yn hytrach na chyfrifo’r rhaniad rhwng yr hyn yr ydych yn ei wario ar eich defnydd preifat a’ch defnydd busnes o’r safle.
Gyda threuliau symlach, rydych yn cyfrifo cyfanswm y treuliau ar gyfer y safle.
Yna rydych yn defnyddio’r cyfraddau unffurf i ddidynnu swm sydd at eich defnydd personol o’r safle, yn seiliedig ar nifer y bobl sy’n byw ar y safle a hawlio’r gweddill fel treuliau eich busnes.
| Nifer y bobl | Cyfradd unffurf y mis |
|---|---|
| 1 | £350 |
| 2 | £500 |
| 3+ | £650 |
Enghraifft
Rydych chi a’ch partner yn rhedeg gwely a brecwast ac yn byw yno trwy gydol y flwyddyn. Cyfanswm eich treuliau safle busnes yw £15,000.
Cyfrifiad:
Cyfradd unffurf: 12 mis x £500 y mis = £6,000
Gallwch hawlio:
£15,000 - £6,000 = £9,000
Os yw rhywun yn byw yn eich safle busnes am ran o’r flwyddyn, dim ond am y misoedd y mae’n byw yno y gallwch ddidynnu’r gyfradd unffurf berthnasol.
Enghraifft
Rydych chi a’ch partner yn rhedeg gwely a brecwast ac yn byw yno trwy gydol y flwyddyn. Mae eich plentyn yn y brifysgol am 9 mis y flwyddyn ond mae’n dod yn ôl i fyw gartref am 3 mis yn ystod yr haf.
Cyfrifiad:
Cyfradd unffurf: 9 mis x £500 y mis = £4,500
Cyfradd unffurf: 3 mis x £650 y mis = £1,950
Cyfanswm = £6,450
Gallwch hawlio:
£15,000 - £6,450 = £8,550
Defnyddiwch y gwiriwr treuliau symlach (yn agor tudalen Saesneg) i gymharu’r hyn y gallwch ei hawlio wrth ddefnyddio treuliau symlach gyda’r hyn y gallwch ei hawlio drwy gyfrifo’r costau gwirioneddol.